Rossiyada yoqilg‘i tanqisligi sababli aholi otlardan foydalanishga o‘tmoqda
Rossiyaning qator hududlarida kuzatilayotgan yoqilg‘i tanqisligi aholining kundalik turmush tarziga sezilarli ta’sir ko‘rsata boshladi. Bu haqda Zamin.uz xabar berdi.
Benzin va dizel yoqilg‘isini topish murakkablashgani sababli, ayniqsa qishloq joylarda yashovchi aholi zamonaviy avtomobillardan voz kechib, yana an’anaviy transport vositasi bo‘lgan otlarga qaytmoqda. Bu holat chorvachilik bozorida otlarga bo‘lgan talabning keskin ortishiga olib keldi.
Mahalliy aholi vakillarining so‘zlariga ko‘ra, bugungi sharoitda ot boqish va undan foydalanish Rossiyada ishlab chiqarilgan UAZ yoki Niva kabi yo‘ltanlamas avtomobillarni saqlashdan ko‘ra arzonroqqa tushmoqda. Yoqilg‘i narxining balandligi va uning taqchilligi sharoitida otlar eng ishonchli yordamchiga aylandi.
Otlar nafaqat yo‘lsiz hududlarda harakatlanish, balki o‘rmondan o‘tin keltirish, pichan tashish va boshqa og‘ir xo‘jalik ishlarini bajarishda juda qo‘l kelmoqda. Ot fermalari egalari bergan ma’lumotlarga ko‘ra, so‘nggi haftalar davomida xaridorlar oqimi bir necha barobarga ko‘paygan.
Agar ilgari bitta otni sotish uchun oylab mijoz kutish kerak bo‘lgan bo‘lsa, hozirgi kunda ayrim otxonalarda bir oyning o‘zida o‘ntacha ot sotilmoqda. Ko‘plab xaridorlar hatto hayvonlarni oldindan band qilib qo‘yishmoqda.
Bu vaziyat chorvadorlar uchun yangi imkoniyatlar ochdi. Mutaxassislarning fikricha, otlarga bo‘lgan bunday yuqori qiziqish minglab jonivorlarning hayotini saqlab qolishga xizmat qildi.
Ilgari talab kamligi sababli so‘yimga topshirilishi rejalashtirilgan otlar endilikda yangi egalari tomonidan xo‘jalik ishlari uchun sotib olinmoqda. Ayni paytda bozorda otlarning narxi ularning yoshi, zoti va ish qobiliyatiga qarab yuz mingdan ikki yuz ming rublgacha bo‘lgan oraliqda baholanmoqda.
Ushbu holat texnologiyalar rivojlangan asrda ham tabiatga va an’anaviy usullarga qaytish zarurati tug‘ilishi mumkinligini yana bir bor isbotladi.
