AQSH Eronning harbiy ob’ektlariga yangi havo zarbalari berdi
Amerika Qo‘shma Shtatlari Ormuz bo‘g‘ozi yaqinida uchta yuk tashuvchi kema snaryadlar bilan shikastlanganidan so‘ng, Eron hududidagi qator ob’ektlarga yangi zarbalar berdi. Bu haqda Zamin.uz xabar berdi.
Shu bilan bir vaqtda Vashington Tehronning xalqaro bozorlarda neft sotishiga imkon beruvchi maxsus ruxsatnomani ham bekor qildi. AQSH Markaziy qo‘mondonligi bergan ma’lumotlarga ko‘ra, harbiy amaliyot davomida 80 dan ortiq nishon o‘qqa tutilgan.
Amerika tomoni ushbu nishonlar orasida Eron Islom inqilobi soqchilari korpusiga tegishli 60 tadan ziyod kichik harbiy kemalar borligini ta’kidlamoqda. Vashington ushbu operatsiyani tijorat kemalariga hujum qilish imkoniyatlarini cheklash maqsadida amalga oshirganini ma’lum qildi.
AQSH qo‘mondonligi Eronning so‘nggi harakatlarini o‘t ochishni to‘xtatish rejimiga zid va dengizda erkin kema qatnoviga jiddiy tahdid deb baholadi. O‘z navbatida, Eron harbiy qo‘mondonligi AQSHning ushbu zarbalarini keskin qoralab, ularni agressiya harakati deb atadi.
Tehron sodir bo‘lgan voqealarga javob qaytarish huquqini saqlab qolishini hamda Ormuz bo‘g‘ozidagi dengiz qatnovini boshqarish ishlariga AQSHning aralashuviga yo‘l qo‘ymasligini bildirdi. Eron manbalaridan olingan xabarlarga ko‘ra, Xark va Qeshm orollarida, shuningdek, mamlakat janubidagi Sirik va Bender-Abbos port shaharlarida kuchli portlashlar sodir bo‘lgan.
Hozircha tinch aholi vakillari orasida halok bo‘lganlar haqida aniq ma’lumotlar mavjud emas. Sirik shahridagi tijorat bandargohiga snaryad tushishi natijasida bir necha kishi jarohat olgani aytilmoqda.
Shuningdek, baliqchilik maskanlariga zarar yetgani va bir nechta baliq ovlash kemalarida yong‘in chiqqani haqida ham ma’lumotlar kelib tushmoqda. Amerika rasmiy vakillarining so‘zlariga ko‘ra, zarbalar asosan Eronning havo hujumidan mudofaa tizimlari, sohilni kuzatish uskunalari, turli raketalar va uchuvchisiz uchish apparatlarini ishga tushirish maydonchalariga qaratilgan.
Ushbu voqealar o‘tgan oyda AQSH va Eron o‘rtasida imzolangan o‘t ochishni to‘xtatish kelishuvi uchun navbatdagi sinov bo‘ldi. Vashington Eronga neft va neft mahsulotlarini xalqaro bozorlarda sotishga imkon bergan asosiy yengilliklardan birini bekor qildi.
Buning oqibatida jahon bozorida neft narxi uch foizdan ko‘proqqa qimmatlashdi. Qatar davlati ham Eronni kemalarga, jumladan, tabiiy gaz tashuvchi yirik tankerga hujum qilishda aybladi.
Doha ma’lumotlariga ko‘ra, kemaga dron yordamida zarba berilgan va natijada yong‘in kelib chiqqan. Shuningdek, Oman sohillari yaqinida Saudiya Arabistoniga tegishli yuk kemasi ham shikastlangani ma’lum qilindi.
Qatar Tashqi ishlar vazirligi ushbu holat yuzasidan Eron elchisi o‘rinbosarini chaqirtirib, unga norozilik bildirgan. Eron tomoni esa barcha ayblovlarni asossiz deb hisoblab, o‘z majburiyatlarini to‘liq bajarayotganini ta’kidlamoqda.
