Pokistonning yuk samolyoti besh nafar ekipaj bilan radarlardan yo‘qoldi
Pokistonda K2 Airways aviakompaniyasiga tegishli bo‘lgan Boeing 737-400 rusumli yuk samolyoti Birlashgan Arab Amirliklarining Sharja shahridan Karachiga parvoz qilayotgan vaqtda aloqadan uzildi. Bu haqda Zamin.uz xabar berdi.
Havo kemasi bortida besh nafar ekipaj a’zosi bo‘lgani ma’lum qilingan. Dastlabki ma’lumotlarga ko‘ra, samolyot Karachi shahrining g‘arbiy qismida, Arab dengizi kengliklari uzra harakatlanayotganda radarlardan yo‘qolgan.
Aloqa butunlay uzilishidan bir oz avval havo kemasi uchuvchisi navigatsiya tizimida jiddiy muammolar yuzaga kelgani haqida yer usti xizmatlariga xabar berishga ulgurgan. Pokiston aeroportlari boshqarmasi vakillari radarlar samolyotning balandlikni keskin yo‘qotgani va parvoz yo‘nalishini kutilmaganda o‘zgartirganini qayd etganini bildirdi.
Shundan so‘ng ekipaj bilan bog‘lanishning imkoni bo‘lmagan. Parvozlar holatini kuzatib boruvchi Flightradar24 xizmati ham olingan dastlabki ma’lumotlar ehtimoliy aviahalokatdan dalolat berishi mumkinligini taxmin qilmoqda.
Shunga qaramay, hozircha samolyotning qulagani haqida rasmiy tasdiqlangan ma’lumotlar mavjud emas. Ayni paytda voqea sodir bo‘lishi mumkin bo‘lgan hududga Pokiston Harbiy-dengiz va Harbiy-havo kuchlarining maxsus bo‘linmalari jalb etilgan.
Qidiruv va qutqaruv ishlarida PNS Zulfiqar harbiy kemasi, uzoq masofali radiolokatsion kuzatuv olib boruvchi Saab 2000 Erieye samolyoti hamda tijorat maqsadlarida foydalaniladigan Lahore kemasi ishtirok etmoqda. Mutaxassislar dengiz hududini sinchiklab ko‘zdan kechirmoqdalar.
Ma’lumot o‘rnida aytish joizki, ushbu Boeing 737-400 havo kemasi avval yo‘lovchi tashish uchun xizmat qilgan, biroq 2012 yilda u yuk tashishga moslashtirilib, qayta jihozlangan edi. Pokiston aviatsiyasi tarixidagi oxirgi eng yirik fojia 2020 yilda yuz bergan bo‘lib, o‘shanda Karachi aeroportiga qo‘nish vaqtida yo‘lovchi samolyoti qulab tushgan va bortdagi 99 kishidan faqat ikki nafari omon qolgan edi.
Hozirda barcha mas’ul idoralar yo‘qolgan yuk samolyoti taqdirini aniqlash ustida ish olib bormoqda.
