Dmitriy Peskov Ukrainadagi qurolli to‘qnashuvni to‘xtatish shartlarini ochiqladi
Rossiya prezidentining matbuot kotibi Dmitriy Peskov Shveysariyaning nufuzli nashrlaridan biri bo‘lgan Die Weltwoche jurnaliga keng ko‘lamli intervyu berdi. Bu haqda Zamin.uz xabar berdi.
Mazkur suhbat davomida Kreml vakili Ukrainadagi qurolli to‘qnashuvni yakunlash shartlarini ochiqladi. Shuningdek, u Rossiya va Amerika Qo‘shma Shtatlari o‘rtasidagi munosabatlar, jahon hamjamiyatini xavotirga solayotgan yadroviy urush xavfi hamda Yevropa xavfsizligining kelajakdagi tuzilishi haqida o‘z fikrlarini bildirdi.
Ushbu intervyu xalqaro maydonda katta shov-shuvga sabab bo‘ldi. Dmitriy Peskovning ta’kidlashicha, Ukrainadagi mojaro juda qisqa muddatda, hatto bir kunda to‘xtashi mumkin.
Buning uchun Kiyev rahbariyatidan faqatgina bitta siyosiy iroda va qat’iy qaror talab etiladi. Kreml vakilining so‘zlariga ko‘ra, Ukraina prezidenti Vladimir Zelenskiy o‘z qo‘shinlarini Rossiya tarkibiga o‘tgan hududlardan olib chiqib ketishi hamda amalda yuzaga kelgan vaziyatni tan olishi lozim.
Shundagina harbiy harakatlar darhol to‘xtatiladi. Peskov Zelenskiy o‘z saylovoldi va’dalarida xalqqa tinchlik olib kelishni so‘z berganini eslatib, unda hali ham ushbu mas’uliyatni bo‘yniga olish imkoniyati borligini qayd etdi.
Global siyosat masalalariga to‘xtalar ekan, Peskov Rossiya va AQSH munosabatlari hozirda eng quyi nuqtada ekanini tan oldi. Shunga qaramay, har ikki tomon muloqot yo‘llarini butunlay yopib qo‘ymaslik uchun yetarlicha mulohaza bilan ish tutayotganini bildirdi.
Donald Trampning muammolarni muloqot orqali hal qilishga intilishi Moskva tomonidan ijobiy baholanmoqda. Yadro qurolidan foydalanish masalasida esa Kreml vakili aniq pozitsiyani bildirdi.
Uning aytishicha, hozirda bunday qurolni ishlatishga hech qanday ehtiyoj yo‘q. Rossiya faqat davlat mustaqilligi va mavjudligiga to‘g‘ridan-to‘g‘ri tahdid tug‘ilgandagina ushbu oxirgi choraga qo‘l urishi mumkin.
G‘arb davlatlarining mazkur mojarodagi ishtiroki ham qattiq tanqid ostiga olindi. Peskovning fikricha, Yevropa davlatlari Ukrainaga shunchaki yordam berayotgani yo‘q, balki razvedka ma’lumotlari va qurol-yarog‘ yetkazib berish orqali jarayonning faol ishtirokchisiga aylanib bo‘lgan.
U Yevropa Ittifoqining Rossiyani harbiy yo‘l bilan mag‘lub etishga urinishini tarixdagi eng katta xato deb atadi. Rossiya Yevropa uchun xavf tug‘dirmasligini, ammo uning milliy manfaatlarini hisobga olish zarurligini ta’kidladi.
Kelajakda baribir yangi xavfsizlik tizimini yaratish uchun muloqot stoliga qaytishga to‘g‘ri kelishi va sahnaga yangi avlod siyosatchilari chiqishi bashorat qilindi.
