Videobloger falaj otasi uchun robotlashtirilgan nogironlar aravachasini yaratdi
Mashhur videobloger falaj bo‘lib qolgan otasining turmush tarzini yaxshilash va unga erkin harakatlanish imkoniyatini berish maqsadida o‘ziga xos loyihani amalga oshirdi. Bu haqda Zamin.uz xabar berdi.
U tog‘li hududlar va notekis yo‘llarda ham bemalol yura oladigan zamonaviy robotlashtirilgan nogironlar aravachasini yaratdi. Ushbu ixtiro qisqa fursat ichida ijtimoiy tarmoq foydalanuvchilari orasida keng muhokamalarga sabab bo‘ldi va ko‘plab ijobiy fikrlarni to‘pladi.
Mazkur loyiha Xitoyning Unitree kompaniyasi tomonidan ishlab chiqarilgan to‘rt oyoqli it ko‘rinishidagi robot platformasiga asoslangan. Muallif ushbu texnologiyani otasining ehtiyojlariga moslashtirish uchun unga mustahkam o‘rindiq, qulay boshqaruv moslamalari va qorong‘i vaqtda yo‘lni yoritish uchun maxsus chiroqlar o‘rnatdi.
Shuningdek, qurilmaning barqarorligini ta’minlash uchun qo‘shimcha qismlar bilan boyitildi. Yaratuvchi faqat tashqi ko‘rinish bilan cheklanib qolmasdan, robotning dasturiy ta’minotini ham butunlay qayta ishlab chiqdi.
Buning natijasida qurilma zinalardan ko‘tarilish, baland-past joylar va murakkab tabiiy releflarda oddiy g‘ildirakli aravachalarga qaraganda ancha samarali harakatlanish qobiliyatiga ega bo‘ldi. Bu texnologiya harakatlanish imkoniyati cheklangan insonlar uchun yangi ufqlarni ochib berishi kutilmoqda.
Ixtirochining so‘zlariga ko‘ra, loyiha hozircha sinov jarayonida bo‘lib, unda ayrim kamchiliklar mavjud. Masalan, robot ba’zi vaziyatlarda muvozanatni saqlay olmay yiqilib tushishi mumkin.
Shunga qaramay, muallif to‘xtab qolish niyatida emas. U qurilmani yanada takomillashtirish, xavfsizlik tizimlarini kuchaytirish va uni kundalik hayotda butunlay ishonchli foydalanish mumkin bo‘lgan transport vositasiga aylantirish ustida ishlashni davom ettirmoqda.
Kelajakda bunday ixtirolar ko‘plab insonlarning og‘irini yengil qilishi shubhasizdir.
