AQSHda o'likxonada tirilgan go'dak bilan bog'liq voqea muhokama qilinmoqda

Amerika Qo'shma Shtatlarida o'n sakkiz oylik go'dak bilan bog'liq kishini hayratga soladigan voqea sodir bo'ldi. Bu haqda Zamin.uz xabar berdi.

Dastlab shifokorlar tomonidan vafot etgan deb e'lon qilingan chaqaloq shifoxona o'likxonasida tirik ekani ma'lum bo'ldi. Ushbu g'ayritabiiy holat yuzasidan huquqni muhofaza qilish organlari tomonidan taqdim etilgan ma'lumotlar jamoatchilik o'rtasida keng muhokamalarga sabab bo'ldi.

Voqea tafsilotlariga ko'ra, Arizona shtatining Gilbert shahridagi xonadonlardan birida oila a'zolari dam olish uchun to'planishgan edi. Ular hovlidagi suv havzasida bolani yuzi bilan suvga qaragan holda topishgan va zudlik bilan qutqaruv xizmatiga qo'ng'iroq qilishgan.

Voqea joyiga yetib kelgan mutaxassislar go'dakka birinchi yordam ko'rsatib, uni shifoxonaga yetkazishgan. Biroq tibbiyot muassasasida shifokor Aryan Tusi qariyb bir soatlik urinishlardan so'ng bolaning vafot etganini rasman tasdiqlagan.

Qiziqarli jihati shundaki, voqea joyida bo'lgan politsiya xodimlari shifokorga bolada hayot alomatlarini ko'rayotganliklarini aytib, e'tiroz bildirishgan. Ammo shifokor o'z bilimiga ishonishini aytib, ularning gaplariga quloq solmagan.

Oradan besh soat o'tgach, sud-tibbiy ekspertiza xodimi o'likxonaga kelganida, go'dakning hali ham nafas olayotganini payqab qolgan. Shundan so'ng bola zudlik bilan boshqa shifoxonaga ko'chirilgan va uzoq muolajalardan so'ng sog'ayib, uyiga qaytgan.

Hozirda mazkur holat yuzasidan tergov harakatlari olib borilmoqda. Politsiya xodimlari bolaning ota-onasiga nisbatan ehtiyotsizlik bo'yicha jinoiy ish qo'zg'atishni taklif qilmoqda.

Tekshiruv davomida aniqlanishicha, o'sha kuni xonadonda kattalar nazorati susaygan va bu bolaning suv havzasiga yolg'iz yaqinlashishiga sabab bo'lgan. Prokuratura ota-onaga nisbatan yakuniy ayblov xulosasini tayyorlamoqda.

Ushbu hodisa ota-onalarni farzandlar xavfsizligiga yanada mas'uliyatli bo'lishga chorlamoqda.