Arabiston dengizida Pokistonning yo'qolgan yuk samolyoti qoldiqlari topildi
Pokiston hukumat vakillari 7-iyul kuni Birlashgan Arab Amirliklarining Sharja shahridan Karachiga yo‘l olgan va parvoz vaqtida aloqa uzilgan Boeing 737-400 rusumli yuk samolyotining qoldiqlari topilganini rasman tasdiqladi. Bu haqda Zamin.uz xabar berdi.
Ushbu ma’lumot Flightradar24 xizmati vakili Yan Petchenik tomonidan jamoatchilikka yetkazildi. K2 Airways aviakompaniyasiga tegishli bo‘lgan ushbu havo kemasining bo‘laklari Arabiston dengizi hududidan, Ormara shahridan taxminan 98 kilometr janubiy yo‘nalishda aniqlangan.
Hozirgi vaqtda qidiruv va qutqaruv guruhlari voqea joyida ish olib bormoqda hamda ekipaj a’zolarini qidirish jarayoni davom etmoqda. Samolyot bortida jami besh kishi, jumladan, ikki nafar uchuvchi, ikki nafar bort muhandisi va bir nafar texnik mutaxassis bo‘lgani ma’lum qilingan.
Dastlabki o‘rganishlar natijasiga ko‘ra, havo kemasi Karachi port shahridan taxminan 250 kilometr g‘arbda, Arabiston dengizi ustida harakatlanayotgan vaqtda radarlardan yo‘qolgan. Pokiston aeroportlari boshqarmasi taqdim etgan hisobotda qayd etilishicha, radar tizimlari samolyotning juda qisqa vaqt ichida balandlikni keskin yo‘qotganini va o‘z yo‘nalishini kutilmaganda o‘zgartirganini aniqlagan.
Halokatdan bir necha daqiqa avval havo kemasi komandiri dispetcherlik xizmati bilan bog‘lanib, navigatsiya tizimida jiddiy nosozliklar yuzaga kelgani haqida xabar berishga ulgurgan. Flightradar24 xizmati mutaxassislari zamonaviy texnologiyalar yordamida olingan ma’lumotlar samolyotning halokatga uchraganini to‘liq tasdiqlashini bildirmoqda.
Pokiston bosh vaziri Shahboz Sharif yuz bergan ushbu mudhish hodisa munosabati bilan ekipaj a’zolarining oila a’zolari va yaqinlariga o‘zining chuqur hamdardligini izhor etdi. Ayni paytda qidiruv ishlarini davlat aviatsiya agentligi muvofiqlashtirib bormoqda.
K2 Airways aviakompaniyasi rahbariyati ham barcha favqulodda xizmatlar bilan doimiy hamkorlikda ishlayotganini ma’lum qildi. Ma’lumot o‘rnida aytish joizki, halokatga uchragan ushbu Boeing 737-400 samolyoti uzoq yillik xizmat tarixiga ega.
U dastlab yo‘lovchi tashish maqsadida ishlab chiqarilgan bo‘lib, 1999-yilda Rossiyaning Aeroflot aviakompaniyasi tarkibida parvozlarni boshlagan. Keyinchalik Indoneziyaning Garuda Indonesia kompaniyasida xizmat qilgan.
2012-yilda esa havo kemasi maxsus uskunalar bilan jihozlanib, yuk tashuvchi samolyotga aylantirilgan. Shundan so‘ng u bir qator xalqaro yuk tashuvchi kompaniyalar tomonidan foydalanib kelingan.
Mutaxassislar hozirda texnik nosozlik yoki tashqi omillar halokatga sabab bo‘lgani borasidagi taxminlarni o‘rganmoqda.
