Italiyadagi Adrian villasi ostidan qadimiy yerosti inshooti topildi
Italiyaning Tivoli shahrida joylashgan mashhur Adrian villasi hududida arxeologlar navbatdagi muhim kashfiyotni amalga oshirdi. Bu haqda Zamin.uz xabar berdi.
Olib borilgan qazish ishlari davomida Rim imperiyasining eng taniqli hukmdorlaridan biriga tegishli saroy ostidan yashirin yerosti inshooti topildi. Mutaxassislarning xulosasiga ko‘ra, ushbu topilma majmua hududidagi hozirgacha ma’lum bo‘lgan eng qadimiy bino bo‘lishi mumkin.
Bu haqda Ispaniyaning Sevilya shahridagi Pablo de Olavide universiteti xabar berdi. Mazkur ulkan saroy milodiy 117-138-yillarda Rim imperiyasini boshqargan imperator Adrianning qarorgohi bo‘lgan.
Adrian tarixda Britaniya shimolidagi mashhur Adrian devorini qurdirgani va imperiya bo‘ylab amalga oshirgan ko‘plab safarlari bilan nom qozongan. Bugungi kunda uning villasi YUNESKOning Butunjahon merosi ro‘yxatiga kiritilgan bo‘lib, har yili dunyoning turli burchaklaridan minglab sayyohlar va tadqiqotchilarni o‘ziga jalb qiladi.
Arxeologlar aniqlagan yerosti inshooti Adrian davridan ancha avval, ya’ni miloddan avvalgi 509-27-yillarni o‘z ichiga oluvchi Rim Respublikasi davriga tegishli ekani taxmin qilinmoqda. Bu esa mazkur qurilma imperator saroyi barpo etilishidan bir necha asr oldin mavjud bo‘lganidan dalolat beradi.
Mutaxassislar ushbu yerosti xonalaridan dastlab omborxona yoki don saqlanadigan joy sifatida foydalanilganini aytmoqda. Keyinchalik binodan foydalanish to‘xtatilib, uning ichi qadimiy qurilish qoldiqlari va sopol buyumlar bilan to‘ldirilgan.
Loyiha rahbari Rafael Idalgoning so‘zlariga ko‘ra, inshootning tuproq bilan to‘liq ko‘milmagani olimlar uchun kutilmagan yangilik bo‘ldi. Qazishmalar davomida ko‘plab keramika parchalari va yaqin atrofdagi binolar tomini bezagan me’moriy terrakota namunalari topildi.
Ayrim bezaklarda it va buqa boshlarining tasvirlari tushirilgan bo‘lib, ular qadimgi Rim me’morchiligi haqida qimmatli ma’lumotlarni o‘zida saqlab qolgan. Olimlar ushbu topilmalar qadimiy villaning qurilish davri va undan foydalanish muddatini aniqlashda muhim ahamiyatga ega ekanini ta’kidlamoqda.
Shuningdek, yerosti inshootining gumbazsimon tom qismi deyarli shikastlanmagan holda yetib kelgan. Hatto qadimgi rimliklar beton quyish jarayonida ishlatgan yog‘och qoliplarning izlari ham aniq ko‘rinib turibdi.
Ushbu kashfiyot Rim tarixidagi ko‘plab noma’lum sahifalarni ochishga yordam beradi, chunki imperator Adrian o‘z saroyini qurishda avvalgi binolarning aksariyat qismini buzdirib tashlagan edi.
