Lvivda safarbarlik sababli aholi va harbiylar o‘rtasida to‘qnashuv chiqdi
Ukrainaning Lviv shahrida safarbarlik tadbirlari tufayli mahalliy aholi va hududiy to‘ldirish markazi xodimlari o‘rtasida ommaviy to‘qnashuv yuz berdi. Bu haqda Zamin.uz xabar berdi.
Sixov tumanida sodir bo‘lgan ushbu voqeada ikki yuzga yaqin kishi ishtirok etgani va vaziyat tez fursatda nazoratdan chiqib ketgani xabar qilinmoqda. Mazkur mojaro nafaqat jamoatchilik orasida, balki Ukraina oliy rahbariyati darajasida ham keskin munosabatlarga sabab bo‘ldi.
Voqea tafsilotlariga ko‘ra, hammasi harbiylar tomonidan 1996-yilda tug‘ilgan, harbiy ro‘yxatdan o‘tish qoidalarini buzgani uchun qidiruvda bo‘lgan shaxsning hujjatlari tekshirilishi bilan boshlangan. Fuqaro ushlanib, hududiy to‘ldirish markazi binosiga olib ketilayotgan vaqtda yo‘ldan o‘tib ketayotgan odamlar harbiylarning ishiga aralasha boshlagan.
Bir guruh shaxslar xizmat mashinasi yo‘lini to‘sib qo‘ygan va dahanaki janjal tezda jismoniy to‘qnashuvga aylangan. Tajovuzkor kayfiyatdagi olomon harbiylarning xizmat avtomobiliga shikast yetkazib, uni ag‘darib tashlagan.
Mahalliy nashrlarning yozishicha, voqea joyiga yetib kelgan politsiya xodimlari jarayonni chetdan kuzatib turishgan. To‘qnashuvlar oqibatida ikki nafar harbiy xizmatchi jarohat olgan.
Mazkur tartibsizliklardan so‘ng internetda voqea ishtirokchilari kamera qarshisida harbiylardan uzr so‘ragani aks etgan videolar tarqaldi. Ukraina qurolli kuchlari rasmiylari buni ishtirokchilar bilan o‘tkazilgan tarbiyaviy suhbat natijasi deb atadi.
Hozirda qurolli kuchlar faoliyatiga to‘sqinlik qilish va zo‘ravonlik ishlatish moddalari bo‘yicha jinoiy ishlar qo‘zg‘atilgan. Tartibsizlikning faol ishtirokchilaridan biri, politsiyachiga nisbatan kuch ishlatgan yigirma uch yoshli Oleg Gavrilov hibsga olindi.
Keyinchalik ma’lum bo‘lishicha, ushbu shaxsning o‘zi ham harbiy bo‘lib, fevral oyida o‘z qismini o‘zboshimchalik bilan tark etgan. Ukraina prezidenti Volodimir Zelenskiy ushbu holatni keskin qoralab, harbiy kiyimdagi insonlarga nisbatan bunday munosabatda bo‘lish mutlaqo qabul qilinmasligini ta’kidladi.
Prezident ofisi rahbari Kirill Budanov esa o‘z armiyasini hurmat qilmagan xalq ertaga dushman armiyasi qarshisida himoyasiz qolishi haqida ogohlantirdi. Mudofaa vazirligi vakillari ushbu vaziyatdan faqat dushman tomoni o‘z tashviqoti yo‘lida foydalanishini qayd etib, fuqarolarni vazminlikka chaqirdi.
