AQSHda o‘zbekistonlik yuk mashinasi haydovchisi yosh sportchi o‘limiga sababchi bo‘ldi
Amerika Qo‘shma Shtatlarida 42 yoshli O‘zbekiston fuqarosi Behzod Asrarov ishtirokida yuz bergan ayanchli yo‘l-transport hodisasi keng jamoatchilik e’tiborini tortdi. Bu haqda Zamin.uz xabar berdi.
Mazkur halokat oqibatida Massachusets universiteti futbol jamoasining 21 yoshli darvozaboni hayotdan ko‘z yumdi. Ushbu fojia yuzasidan qo‘zg‘atilgan jinoiy ish doirasida hamyurtimiz asosiy ayblanuvchi sifatida ishtirok etmoqda.
Dastlabki ma’lumotlarga ko‘ra, Behzod Asrarov boshqaruvidagi yuk mashinasi yosh sportchi ketayotgan yengil avtomobil bilan to‘qnashgan. Kuchli zarba natijasida yuk mashinasi qarama-qarshi yo‘nalishga chiqib ketib, yana bir nechta transport vositalari bilan to‘qnashuvlar sodir etgan.
Tergov jarayonida ma’lum bo‘lishicha, haydovchi AQSHga 2024-yilda grin-karta yutib olib ko‘chib o‘tgan. U ingliz tilini yetarli darajada bilmagani sababli huquq-tartibot idoralari xodimlari u bilan maxsus onlayn tarjimon yordamida muloqot qilishga majbur bo‘lishgan.
Asrarovga nisbatan nafaqat ehtiyotsizlik orqasidan odam o‘limiga sabab bo‘lish, balki jinoyat dalillarini yashirishga urinish ayblovi ham qo‘yilmoqda. Tergov talqiniga ko‘ra, haydovchi avariya sodir bo‘lganidan so‘ng yuk mashinasidagi videoregistratorni yechib olgan.
Shuningdek, u o‘zidagi uchta mobil telefonni hamda ish vaqtini hisobga olib boruvchi elektron qurilmani qasddan shikastlagan. Mutaxassislar ushbu harakatlar orqali yuk mashinasining harakatlanish tezligi va haydovchining ish tartibiga oid muhim ma’lumotlarni yo‘q qilish ko‘zlangan deb hisoblamoqda.
Ushbu voqea butun mamlakat bo‘ylab qizg‘in bahs-munozaralarga sabab bo‘ldi. Hatto AQSH transport vaziri ham mazkur holat yuzasidan munosabat bildirib, ingliz tilini bilmaydigan yuk mashinasi haydovchilariga mehnat faoliyati bilan shug‘ullanishni taqiqlash masalasini ko‘rib chiqishni taklif qildi.
Hozirda sud jarayoni davom etmoqda va barcha holatlarga huquqiy baho berilishi kutilmoqda.
