Kyolnda Ikkinchi jahon urushidan qolgan yirik aviabomba topildi
Germaniyaning Kyoln shahridagi Yoxannes-Gisberts bog‘ida Ikkinchi jahon urushi davridan qolgan yirik aviabomba topildi. Bu haqda Zamin.uz xabar berdi.
Og‘irligi 500 kilogramm bo‘lgan ushbu portlovchi moslama so‘nggi kunlarda olib borilgan maxsus qidiruv va tekshiruv ishlari natijasida aniqlangan. Mutaxassislar dastlab mazkur hududda 150 ta shubhali nuqtani nazoratga olgan edilar.
Keyinchalik o‘tkazilgan tahlillar natijasida ularning aksariyati xavfsiz ekani ma’lum bo‘ldi va tekshirilishi lozim bo‘lgan joylar soni 14 tagacha qisqartirildi. Xavfli snaryad aynan mana shu nuqtalarning biridan topilgan.
Mazkur holat sababli shahar ma’muriyati zudlik bilan xavfsizlik choralarini ko‘rdi. Bomba topilgan joy atrofida 500 metrlik masofada maxsus xavfsizlik hududi belgilandi.
Natijada ushbu hududda istiqomat qiluvchi 4300 nafarga yaqin aholi vaqtincha xavfsiz joylarga ko‘chirildi. Shuningdek, bog‘ yaqinida joylashgan bolalar shifoxonasi ham to‘liq bo‘shatildi.
Shifoxonada davolanayotgan 43 nafar bemor bolalar maxsus transport vositalarida boshqa tibbiyot muassasalariga yetkazildi. Evakuatsiya jarayoni faqat aholi yashash joylari bilan cheklanib qolmadi.
Hududdagi bolalar bog‘chasi, Lentpark suzish havzasi hamda botanika bog‘i ham o‘z faoliyatini vaqtincha to‘xtatishga majbur bo‘ldi. Mutaxassislar bombani zararsizlantirish ishlarini olib borayotgan vaqtda Kyoln shahridagi bir qator markaziy ko‘chalarda harakat butunlay to‘sildi.
Ayniqsa, ko‘prikka olib boruvchi yo‘llarda transport qatnovi cheklandi. Jamoat transporti tizimida ham o‘zgarishlar yuz berib, bitta tramvay liniyasi va uchta avtobus yo‘nalishi vaqtincha ishlamadi.
Hozirda mutaxassislar xavfni bartaraf etish choralarini ko‘rmoqdalar.
