Moskvada harbiy mulozimga qarshi rejalashtirilgan teraktning oldi olindi
Rossiya Federal xavfsizlik xizmati Moskva shahrida Mudofaa vazirligining yuqori martabali mulozimiga nisbatan rejalashtirilgan terrorchilik harakatining oldi olingani haqida rasmiy bayonot berdi. Bu haqda Zamin.uz xabar berdi.
Mazkur amaliyot davomida 2001-yilda tug‘ilgan Rossiya fuqarosi bo‘lgan ayol kishi qo‘lga olindi. Maxsus xizmatlarning ta’kidlashicha, ushbu shaxs Ukraina maxsus xizmatlari bilan yashirin hamkorlik qilib kelgan.
Tergov ma’lumotlariga ko‘ra, qo‘lga olingan ayol 2024-yilning boshida ijtimoiy tarmoqlar orqali maxfiy hamkorlikka jalb etilgan. Unga Moskva va Sankt-Peterburg shaharlaridagi muhim obektlar haqida ma’lumot to‘plash, belgilangan harbiy xizmatchining yashash joyi hamda foydalanadigan avtomashinasini kuzatib borish vazifasi yuklangan.
To‘plangan barcha ma’lumotlar muntazam ravishda Ukrainadagi koordinatorga yuborib turilgan. Federal xavfsizlik xizmati vakillari ayol kishi terrorchilik harakatini bevosita amalga oshirishi kerak bo‘lgan shaxs uchun maxsus ijara xonadonini tayyorlab qo‘yganini ma’lum qildi.
Qiziqarli jihati shundaki, ukrainalik koordinator ayolni o‘ziga bo‘ysundirish va topshiriqlarni bajarishga majburlash uchun ishqiy munosabatlar usulidan foydalangan. U o‘zini ayolga nisbatan kuchli his-tuyg‘ulari bor inson sifatida ko‘rsatib, kelajakda birga bo‘lishni va’da qilgan.
Hozirgi vaqtda mazkur holat yuzasidan Rossiya huquq-tartibot idoralari tomonidan tergov harakatlari olib borilmoqda. Qo‘lga olingan shaxsga nisbatan tegishli moddalar bilan jinoyat ishi qo‘zg‘atilgan bo‘lib, barcha tafsilotlar aniqlanmoqda.
Ushbu voqea poytaxtda xavfsizlik choralarining yanada kuchaytirilishiga sabab bo‘ldi. Mutasaddilar fuqarolarni ogohlikka chaqirib, shubhali harakatlar haqida darhol xabar berishni so‘ramoqda.
