AQSHda o‘zbekistonlik haydovchi ishtirokidagi avtohalokatda yosh futbolchi vafot etdi
Amerika Qo‘shma Shtatlarida 42 yoshli o‘zbekistonlik yuk mashinasi haydovchisi Behzod Asrorov ishtirokida sodir bo‘lgan mudhish yo‘l-transport hodisasi keng jamoatchilik e’tiborini tortdi. Bu haqda Zamin.uz xabar berdi.
Mazkur fojia oqibatida Massachusets universiteti futbol jamoasining 21 yoshli iqtidorli darvozaboni hayotdan ko‘z yumdi. Hozirda hamyurtimizga nisbatan og‘ir ayblovlar ilgari surilmoqda va tergov harakatlari olib borilmoqda.
Tergov xulosalariga ko‘ra, Behzod Asrorov boshqaruvidagi yuk mashinasi sportchi harakatlanayotgan yengil avtomobil bilan to‘qnashgan. Kuchli zarba natijasida yuk mashinasi qarama-qarshi yo‘nalishga chiqib ketib, yana bir nechta transport vositalari bilan to‘qnashuv sodir etgan.
Afsuski, yosh futbolchi olgan og‘ir jarohatlari tufayli voqea joyida vafot etgan. Ushbu holat AQSHda katta rezonans keltirib chiqardi.
Aniqlanishicha, Asrorov 2024-yilda grin-karta yutib olib, AQSHga ko‘chib o‘tgan. U ingliz tilini yetarli darajada bilmagani sababli, voqea joyiga kelgan politsiya xodimlari u bilan maxsus onlayn tarjimon dasturlari orqali muloqot qilishga majbur bo‘lgan.
Aynan shu holat mamlakatda xorijlik haydovchilarning til bilish darajasi va xavfsizlik talablari bo‘yicha yangi bahs-munozaralarni keltirib chiqardi. Huquqni muhofaza qiluvchi organlar haydovchini dalillarni qasddan yo‘q qilishda ayblamoqda.
Tergovchilarning ta’kidlashicha, avariyadan so‘ng yuk mashinasidagi videoregistrator uzib qo‘yilgan, uchta mobil aloqa vositasi shikastlangan hamda haydovchining ish vaqtini qayd etuvchi elektron moslama ishdan chiqarilgan. Mutaxassislar bu harakatlarni yuk mashinasining avariyagacha bo‘lgan haqiqiy holatini yashirishga urinish deb baholamoqda.
Hozirda Behzod Asrorovga nisbatan ehtiyotsizlik orqasida odam o‘ldirish va dalillarni soxtalashtirish bo‘yicha ayblovlar e’lon qilingan. Sud jarayonlari hali yakuniga yetmagan bo‘lsa-da, mazkur voqea siyosiy darajadagi muhokamalarga sabab bo‘ldi.
AQSH transport vaziri ingliz tilini bilmaydigan haydovchilarning tijoriy transport vositalarini boshqarishiga cheklovlar qo‘yish masalasini ko‘tarib chiqdi. Endilikda ushbu sud ishi mamlakatdagi transport xavfsizligi qoidalarining yanada kuchaytirilishiga turtki bo‘lishi mumkin.
