Venesuela poytaxtida yangi yer silkinishi sodir bo‘ldi
Venesuela davlati ketma-ket yuz berayotgan tabiiy ofatlar oqibatida ogir vaziyatni boshidan kechirmoqda. Bu haqda Zamin.uz xabar berdi.
Bugun, 11-iyul kuni mamlakat poytaxti Karakas shahrida 3 magnitudali navbatdagi yer silkinishi qayd etildi. Mazkur hodisa haqida xalqaro ommaviy axborot vositalari xabar tarqatdi.
Olingan so‘nggi ma’lumotlarga ko‘ra, joriy yilning 24-iyun kuni yuz bergan kuchli zilzila oqibatida halok bo‘lganlar soni 4 118 nafarga yetdi. Shuningdek, 16 ming 740 dan ortiq kishi turli darajadagi tan jarohatlarini olgan.
Minglab fuqarolar esa hanuzgacha bedarak yo‘qolganlar ro‘yxatida qolmoqda, bu esa qurbonlar soni yana ortishi mumkinligidan dalolat beradi. Mutaxassislarning fikricha, ushbu tabiiy ofat Venesuela tarixida so‘nggi yuz yildan ortiq vaqt mobaynida kuzatilgan eng talafotli va vayronkor zilzilalardan biri bo‘ldi.
Ayniqsa, dengiz bo‘yida joylashgan La-Guayra shtatida ko‘plab turar joy binolari, maktablar va boshqa muhim infratuzilma obektlari butunlay vayron bo‘lgan yoki jiddiy zarar ko‘rgan. Rasmiy doiralar vakillari vayronalar ostidan tirik qolganlarni qidirish va qutqarish ishlari yakunlanganini e’lon qildi.
Biroq, yaqinlaridan hech qanday xabar topa olmagan mahalliy aholi vakillari hali ham umidini uzmasdan, xarobalar orasida o‘z yaqinlarini mustaqil ravishda izlashda davom etmoqda. 11-iyul kuni sodir bo‘lgan navbatdagi yer qimirlashi poytaxt aholisi o‘rtasida sarosima keltirib chiqardi va ehtiyot chorasi sifatida bir qator ko‘p qavatli binolardan odamlar xavfsiz joylarga ko‘chirildi.
Shu bilan birga, Birlashgan Millatlar Tashkiloti dunyo hamjamiyatiga murojaat qilib, Venesueladagi gumanitar inqirozni yumshatish uchun qariyb 300 million AQSH dollari miqdorida shoshilinch yordam ajratishga chaqirdi. Dastlabki hisob-kitoblarga ko‘ra, mamlakat iqtisodiyotiga, xususan uy-joy va infratuzilma tizimiga yetkazilgan umumiy zarar 37 milliard AQSH dollaridan oshib ketgan.
Hozirda mamlakatda tiklash ishlari va jabrlanganlarga ko‘mak ko‘rsatish choralari ko‘rilmoqda.
