Tojikistonning Sug‘d viloyatida kuchli sel ko‘prik va yo‘llarni vayron qildi

Tojikistonning Sugd viloyati Ayniy tumanida joylashgan Darg qishlogida 11-iyul kuni kuchli sel kelishi bilan bogliq tabiiy ofat yuz berdi. Bu haqda Zamin.uz xabar berdi.

Toglardan katta tezlikda oqib tushgan loy va tosh aralashmasidan iborat ulkan sel oqimi qisqa vaqt ichida hududdagi bir qancha infratuzilma obyektlariga jiddiy zarar yetkazdi. Ijtimoiy tarmoqlarda tarqalgan videolavhalarda sel oqimining naqadar kuchli ekani, u yo‘llar va ko‘priklarni vayron qilib, aholi punktlariga tomon shiddat bilan harakatlanayotgani aks etgan.

Mahalliy aholi tomonidan tasvirga olingan ushbu kadrlar hodisaning kuchi va talafotlar ko‘lamini yaqqol ko‘rsatib turibdi. Tabiiy ofat aks etgan videolar internet foydalanuvchilari orasida keng muhokamalarga sabab bo‘ldi va kishilarda katta xavotir uyg‘otdi.

Sel oqimi nafaqat transport qatnovini qiyinlashtirgan, balki qishloq xo‘jaligi yerlari va aholi tomorqalariga ham o‘z ta’sirini o‘tkazgan bo‘lishi mumkinligi taxmin qilinmoqda. 13-iyul holatiga ko‘ra, Tojikistonning mas’ul davlat idoralari va Favqulodda vaziyatlar qo‘mitasi tomonidan hodisa oqibatida insonlar orasida qurbonlar yoki jarohatlanganlar bor-yo‘qligi to‘g‘risida rasmiy ma’lumot berilmagan.

Shuningdek, yetkazilgan moddiy zarar miqdori ham hozircha aniqlanmoqda. Mutaxassislar voqea joyida o‘rganish ishlarini olib borib, sel keltirgan oqibatlarni bartaraf etish choralarini ko‘rishmoqda.

Ta’kidlash joizki, ushbu hodisadan bir necha kun avval Tojikiston meteorologiya xizmati mamlakatning tog‘li va tog‘oldi hududlarida havo haroratining o‘zgarishi hamda kutilayotgan kuchli yog‘ingarchiliklar sababli sel kelish xavfi yuqori ekanidan aholini ogohlantirgan edi. Mutaxassislar tog‘li hududlarda yashovchi aholini va sayyohlarni ehtiyot choralarini ko‘rishga hamda xavfli hududlardan uzoqroq turishga chaqirib kelmoqda.

Hozirda hududda vaziyat nazoratga olingan bo‘lib, tiklash ishlari rejalashtirilmoqda.