AQSH armiyasining uzoq masofali raketalar zaxirasi tugab bormoqda
Amerika Qo‘shma Shtatlari armiyasi Eron bilan besh oydan buyon davom etayotgan harbiy ziddiyatlar jarayonida uzoq masofaga mo‘ljallangan yuqori aniqlikdagi raketalar zaxirasining asosiy qismini sarflab bo‘ldi. Bu haqda One.uz xabar beradi.
Reuters axborot agentligining vaziyatdan xabardor manbalarga tayanib xabar berishicha, Pentagon ixtiyoridagi yer usti nishonlarini yo‘q qilishga mo‘ljallangan ATACMS va PrSM raketalari deyarli tugash arafasida turibdi. Harbiy omborlarda qolgan aniq qurollar soni maxfiy tutilayotgan bo‘lsa-da, mutaxassislar mavjud holat mamlakatning mudofaa salohiyatiga salbiy ta’sir ko‘rsatishi mumkinligidan xavotir bildirmoqda.
Strategik qurollar zaxirasidagi taqchillik AQSH armiyasi foydalanayotgan ATACMS tizimlari uzoq masofadagi nishonlarni yuqori aniqlikda yakson qilish imkoniyati bilan ajralib turadi. Ushbu qurol turidan Ukraina ham Rossiya hududidagi strategik obektlarga zarba berishda foydalanib kelmoqda.
PrSM raketalari esa ATACMS o‘rnini bosishi kerak bo‘lgan yangi avlod quroli hisoblanib, hozirda ularning zaxirasi ham keskin kamayib ketgan. Har birining qiymati bir million dollardan oshadigan ushbu raketalar AQSH uchun nafaqat Yaqin Sharqdagi amaliyotlar, balki kelajakda Tinch okeani mintaqasida Xitoy bilan yuzaga kelishi mumkin bo‘lgan ehtimoliy to‘qnashuvlar uchun ham o‘ta muhim sanaladi.
Ishlab chiqarish quvvatlarini oshirish choralari Mojaroning kutilganidan ko‘ra uzoqroq davom etishi Vashingtonni qurol-yarog‘ arsenalini zudlik bilan qayta to‘ldirish choralarini ko‘rishga majbur qilmoqda. Harbiy ekspertlarning ta’kidlashicha, zaxiralarning kamayishi AQSHning global xavfsizlikni ta’minlash borasidagi imkoniyatlarini cheklab qo‘yishi mumkin.
Shu sababli, Pentagon yirik mudofaa kompaniyalari bilan hamkorlikni kuchaytirmoqda. Xususan, Raytheon kompaniyasi bilan Tomahawk raketalarini ishlab chiqarish hajmini sezilarli darajada oshirish bo‘yicha ko‘p yillik shartnoma imzolandi.
Bu chora AQSH harbiy salohiyatini tiklash va strategik zaxiralarni to‘ldirishga qaratilgan keng ko‘lamli rejaning bir qismidir. Hozirgi kunda AQSH hukumati bir vaqtning o‘zida ham ittifoqchilarni qurol bilan ta’minlash, ham o‘z armiyasi ehtiyojlarini qondirish masalasida murakkab muammolarga duch kelmoqda.
