Braziliyalik baliqchi va pingvin o'rtasidagi noodatiy do'stlik hikoyasi
Braziliyalik baliqchi Juan Pereyra de Souza va Din-Dim ismli pingvin o‘rtasidagi noodatiy do‘stlik hikoyasi insoniyat hamda tabiat o‘rtasidagi samimiy bog‘liqlikning yorqin namunasidir. Bu haqda One.uz xabar beradi.
Hammasi 2011-yilda, baliqchi dengiz sohilidan neftga belangan va o‘lim yoqasida turgan kichik pingvinni topib olganidan boshlangan. Juan qushni qutqarib, uni haftalab parvarish qilgan, tozalagan va sog‘ligini tiklashiga yordam bergan.
Qush butunlay tuzalganidan so‘ng, baliqchi uni ochiq dengizga qo‘yib yuborgan, biroq kutilmaganda pingvin o‘sha kunning o‘zidayoq o‘z xaloskorining yoniga qaytib kelgan va o‘shandan beri har yili uzoq masofani bosib o‘tib, uni ko‘rgani kelishni odat qilgan. Tabiatning hayratlanarli sadoqati Janubiy Amerika qirg‘oqlarida yashovchi ushbu pingvin har yili Argentina va Chili sohillari tomon suzib ketadi.
U o‘zining tabiiy yashash muhitida ko‘payish va oziqlanish mavsumini o‘tkazgach, yana Braziliyaga, aynan o‘zini qutqargan inson yashaydigan qishloqqa qaytadi. Mutaxassislarning hisob-kitoblariga ko‘ra, Din-Dim laqabli ushbu qush har yili Juanni ko‘rish uchun okean bo‘ylab 8 ming kilometrdan ortiq masofani bosib o‘tadi.
Bu holat olimlarni ham hayratga solgan, chunki yovvoyi tabiat vakilining insonga nisbatan bunday kuchli bog‘liqlik ko‘rsatishi kamdan-kam uchraydigan hodisadir. Faqat bir insonga bo‘lgan ishonch Qushning xulq-atvori ham o‘ziga xosligi bilan ajralib turadi.
Din-Dim boshqa odamlarga nisbatan juda ehtiyotkor munosabatda bo‘ladi va begonalarning o‘ziga yaqinlashishiga, silashiga mutlaqo yo‘l qo‘ymaydi. Agar kimdir unga tegmoqchi bo‘lsa, u o‘zini himoya qila boshlaydi.
Biroq Juan bilan munosabatda u butunlay o‘zgaradi: baliqchining bag‘riga talpinadi, uning qo‘lidan baliq yeydi va o‘zini erkalashlariga ijozat beradi. Bu holat hayvonlarning ham minnatdorchilik hissini tushunishi va o‘ziga yaxshilik qilgan insonni yillar davomida eslab qolishidan dalolat beradi.
Ushbu voqea butun dunyo bo‘ylab keng tarqalib, ko‘plab insonlarning qalbidan joy oldi. Bu shunchaki bir qushning hayoti haqidagi hikoya emas, balki mehribonlik va g‘amxo‘rlik hatto eng yovvoyi mavjudotlarning ham ishonchini qozonishga qodir ekanligini isbotlovchi hayotiy saboqdir.
Juan va Din-Dimning do‘stligi tabiat qonuniyatlaridan ustun turuvchi o‘zaro mehrning ramziga aylandi. Hozirda ushbu voqea hayvonot dunyosini o‘rganuvchi tadqiqotchilar va oddiy insonlar uchun sadoqatning eng go‘zal namunalaridan biri sifatida e’tirof etiladi.
