Eron AQSH harbiylarini qo'lga olganlarga pul mukofoti va'da qildi
Eron qurolli kuchlari mamlakat hududiga bostirib kirgan AQSH harbiy xizmatchilarini qo‘lga olgan yoki yo‘q qilgan shaxslarga yirik miqdorda pul mukofoti to‘lanishini e’lon qildi. Bu haqda One.uz xabar beradi.
Eron davlat axborot agentligi bergan ma’lumotlarga ko‘ra, ushbu qaror mamlakat mudofaa tizimi tomonidan fuqarolarning ko‘plab murojaatlari asosida qabul qilingan. Rasmiy bayonotda aytilishicha, chet el harbiylarini qo‘lga olishda qatnashgan shaxslarga o‘n minglab dollar miqdorida moddiy rag‘bat berilishi ko‘zda tutilgan.
Eron armiyasi qo‘mondoni general-mayor Amir Hotamining ta’kidlashicha, agar AQSH harbiylari Eron chegarasini noqonuniy kesib o‘tsa, ulardan birini asirga olgan yoki zararsizlantirgan har bir shaxsga 30 ming dollar miqdorida mukofot beriladi. Qizig‘i shundaki, harbiy rahbariyat ayollar tomonidan amalga oshirilgan shunday harakatlar uchun mukofot miqdorini ikki baravar ko‘p, ya’ni 60 ming dollar etib belgilagan.
Hozircha ushbu to‘lovlar qaysi manbalar hisobidan va qanday tartibda amalga oshirilishi bo‘yicha aniq mexanizmlar ochiqlanmagan. Harbiy texnika va qurollarni qayta sotib olish General Hotami nafaqat shaxsiy tarkibni qo‘lga olish, balki AQSH harbiylariga tegishli qurol-yarog‘larni topshirish bo‘yicha ham alohida takliflarni ilgari surdi.
Unga ko‘ra, amerikalik harbiylardan tortib olingan qurollar davlat tomonidan bozor narxidan ikki baravar yuqori qiymatda sotib olinishi yoki ularning o‘rniga yangi turdagi qurollar berilishi mumkin. Bu choralar mamlakat mudofaa salohiyatini kuchaytirish va aholining vatanparvarlik ruhini rag‘batlantirish maqsadida amalga oshirilayotgani aytilmoqda.
Mazkur bayonot Vashington va Tehron o‘rtasidagi siyosiy hamda harbiy keskinlik eng yuqori nuqtaga chiqqan bir davrda yangradi. Eron tomoni avval ham bir necha bor AQSH qo‘shinlarining mintaqadagi harakatlariga nisbatan keskin javob qaytarishini bildirgan edi.
Shunga qaramay, hozirgi vaqtda AQSH quruqlik qo‘shinlarining Eron hududida mavjudligi haqida hech qanday tasdiqlangan ma’lumotlar yo‘q. Mutaxassislarning fikricha, bunday bayonotlar ko‘proq tashviqot xarakteriga ega bo‘lib, tashqi bosimga nisbatan psixologik javob sifatida baholanmoqda.
