Singapurda har bir bola uchun 55 ming dollar yordam beriladi
Singapur hukumati mamlakatda tugilish darajasi keskin pasayib borayotgani sababli oilalarni farzandli bo‘lishga rag‘batlantirishga qaratilgan yangi ijtimoiy yordam dasturini e’lon qildi. Bu haqda One.uz xabar beradi.
Mazkur loyihaga ko‘ra, har bir bola 17 yoshga to‘lguniga qadar davlat tomonidan jami 70 ming Singapur dollari, ya’ni qariyb 55 ming AQSH dollari miqdorida moliyaviy ko‘mak bilan ta’minlanadi. Ushbu chora-tadbirlar nafaqat tug‘ilishni ko‘paytirish, balki oilalarning uzoq muddatli iqtisodiy barqarorligini qo‘llab-quvvatlashga xizmat qilishi ko‘zda tutilgan.
Yangi tartibga muvofiq, belgilangan mablag‘ning 10 ming Singapur dollari bola dunyoga kelgan vaqtda to‘lab beriladi. Yana shuncha miqdordagi mablag‘ bolaning kelajakdagi ta’lim xarajatlari uchun maxsus jamg‘arib boriladi.
Qolgan qismi esa farzandning ulg‘ayish bosqichlariga qarab, ma’lum muddatlarda bo‘lib beriladi. Hukumat bu orqali ota-onalarga bolani voyaga yetkazish davomida doimiy moddiy yordam ko‘rsatishni maqsad qilgan.
Ijtimoiy imtiyozlar va uy-joy masalasi Moliyaviy to‘lovlardan tashqari, ko‘p farzandli oilalar uchun mehnat qonunchiligida ham qator yengilliklar nazarda tutilmoqda. Xususan, ota-ona ta’tili davridagi to‘lovlar miqdori oshirilib, ish beruvchilar zimmasidagi xarajatlarning asosiy qismi davlat byudjeti hisobidan qoplanadi.
Shuningdek, farzandli bo‘lgan yosh oilalarga o‘zlarining birinchi uy-joyini sotib olishlari uchun imtiyozli kreditlar va maxsus dasturlar taklif etiladi. Singapurda demografik holat o‘tgan yili rekord darajadagi eng past ko‘rsatkichga tushib ketgani mutaxassislarni xavotirga solmoqda.
Hozirgi kunda mamlakatda bir ayolga to‘g‘ri keladigan farzandlar soni o‘rtacha 0,87 nafarni tashkil etmoqda. Vaholanki, aholi sonini tabiiy ravishda barqaror saqlab turish uchun bu ko‘rsatkich kamida 2,1 nafardan kam bo‘lmasligi lozim.
Demografik inqiroz va kelajakdagi rejalar Aholining tez sur’atlar bilan qarib borishi Singapur oldida turgan eng jiddiy muammolardan biridir. Xalqaro mezonlarga ko‘ra, agar aholining 21 foizidan ortig‘ini 65 yoshdan oshgan insonlar tashkil etsa, bunday davlatlar o‘ta keksaygan jamiyatlar qatoriga kiradi.
Singapur joriy yilda aynan mana shu bosqichga yetib kelishi kutilmoqda. Bu esa kelajakda iqtisodiy faol yoshlar qatlamining kamayib ketishiga olib kelishi mumkin.
Mamlakat Bosh vaziri Lourens Vongning ta’kidlashicha, hukumat tomonidan ko‘rilayotgan keng ko‘lamli choralarga qaramay, tug‘ilish darajasini tezda kerakli me’yorgacha ko‘tarish oson bo‘lmaydi. Shu sababli, davlat aholi sonini saqlab qolish uchun faqat tug‘ilishga tayanib qolmasdan, nazorat qilingan immigratsiya siyosatini ham davom ettiradi.
Bunda asosiy e’tibor Singapur fuqarolarining mamlakatdagi ustunligini saqlab qolgan holda, malakali mutaxassislarni jalb qilishga qaratiladi.
