Afg'onistonda olti yoshli qizning majburiy nikohi bekor qilindi
Afg‘onistonning Hilmand viloyatida olti yoshli qizaloqning 60 yoshli erkakka sotib yuborilishi bilan bog‘liq mudhish voqea sodir bo‘ldi. Bu haqda One.uz xabar beradi.
Oila boshlig‘i o‘z farzandini 200 ming Pokiston rupiyasi evaziga nikohlab bergani aniqlangan. Mahalliy rasmiylarning aralashuvi va sud qarori bilan mazkur g‘ayriinsoniy nikoh bekor qilindi.
Ushbu holat mamlakatda iqtisodiy inqiroz va qashshoqlik sababli bolalar huquqlarining qo‘pol ravishda buzilayotganini yana bir bor tasdiqladi. Garmser tumanida yuz bergan ushbu voqea tafsilotlariga ko‘ra, qizning otasi giyohvandlikka ruju qo‘ygan bo‘lib, moddiy yetishmovchilikni ro‘kach qilib o‘z farzandini keksa yoshli kishiga sotgan.
Viloyat ma’muriyati ushbu holat yuzasidan tekshiruv o‘tkazib, ishni sudga oshirgan. Yakunda nikoh qonunga zid deb topildi va bekor qilindi.
Biroq bunday holatlar viloyatning boshqa hududlarida ham kuzatilayotgani jamoatchilikni tashvishga solmoqda. Bolalar huquqlarining poymol etilishi Xususan, Hilmand viloyatining Nad Ali tumanida ham shunga o‘xshash voqea qayd etildi.
Sakkiz yoshli qizaloqni 80 yoshli qariyaga turmushga berish rejalashtirilgan edi. Mahalliy faollar va rasmiylarning o‘z vaqtida chora ko‘rishi natijasida bu nikohning oldi olindi.
Bu kabi voqealar Afg‘onistonda voyaga yetmagan qizlarning taqdiri jiddiy xavf ostida ekanini ko‘rsatmoqda. Xalqaro tashkilotlar va inson huquqlari himoyachilari Afg‘onistondagi ijtimoiy-iqtisodiy vaziyat yomonlashgani sari voyaga yetmagan bolalarni majburiy nikohlash holatlari ko‘payayotganidan xavotir bildirmoqda.
Qizlarning ta’lim olishdan mahrum etilishi va oilalardagi o‘ta og‘ir qashshoqlik darajasi bunday ayanchli holatlarning asosiy sabablari sifatida ko‘rilmoqda. Mazkur muammolarni bartaraf etish uchun nafaqat ichki nazorat, balki keng ko‘lamli ijtimoiy islohotlar zarurligi ta’kidlanmoqda.
