Singapurda kitob o'qigan aholiga pul to'lash tizimi yo'lga qo'yildi

Singapurda aholi orasida kitobxonlik madaniyatini yuksaltirish va muntazam mutolaa odatini shakllantirish maqsadida ReadSG deb nomlangan yangi milliy dastur ishga tushirildi. Bu haqda One.uz xabar beradi.

Singapur Milliy kutubxona kengashi tomonidan 2026-yil 6-sentyabr kuni yo‘lga qo‘yilgan ushbu tashabbus doirasida fuqarolar kuniga kamida 15 daqiqa kitob o‘qiganliklari uchun moddiy rag‘batlantiriladi. Ishtirokchilar o‘qish jarayonini maxsus platformada qayd etib, to‘plangan virtual ballarni naqd pul ko‘rinishidagi mablag‘larga almashtirish imkoniyatiga ega bo‘ladilar.

Dastur shartlariga ko‘ra, ReadSG loyihasida qatnashuvchilar mutolaa uchun sarflagan vaqtlarini hukumatning CrowdTask SG elektron platformasi orqali hisoblab boradilar. Har bir 15 daqiqalik faol mutolaa uchun foydalanuvchiga 20 ta virtual tanga taqdim etiladi.

Ishtirokchi jami 1000 ta tanga to‘plaganidan so‘ng, ularni 1 Singapur dollari miqdoridagi haqiqiy pulga almashtirishi mumkin. Bu tizim aholini, ayniqsa yoshlarni kitob o‘qishga qiziqtirishning samarali usuli sifatida ko‘rilmoqda.

Mutolaa orqali raqamli chalg‘ishlarga qarshi kurash Loyiha tashkilotchilarining tushuntirishicha, ushbu tashabbusdan ko‘zlangan asosiy maqsad odamlarni zamonaviy raqamli dunyodagi qisqa va yuzaki ma’lumotlardan chalg‘itishdir. Ijtimoiy tarmoqlardagi tezkor videolar va yengil kontentlar insonning diqqatni jamlash qobiliyatini susaytirayotgan bir paytda, muntazam kitob o‘qish fikrlash doirasini kengaytirishga xizmat qiladi.

Milliy kutubxona kengashi rahbari Melissa Tamning ta’kidlashicha, kuniga 15 daqiqa vaqt ajratish har qanday inson uchun qiyinchilik tug‘dirmaydigan, ammo uzoq muddatda foydali odatga aylanadigan boshlang‘ich qadamdir. Milliy harakatning yangi bosqichi ReadSG dasturi besh yilga mo‘ljallangan keng ko‘lamli strategik rejaning bir qismi bo‘lib, u avvalgi milliy kitobxonlik harakatining o‘rnini egalladi.

2024-yilda o‘tkazilgan ijtimoiy so‘rovnomalar natijasiga ko‘ra, Singapurdagi katta yoshli aholining atigi 28 foizi haftasiga bir marta kitob mutolaa qilishi aniqlangan. Yangi tizim esa ushbu ko‘rsatkichni sezilarli darajada oshirishni va kitob o‘qishni har bir fuqaroning kundalik turmush tarziga aylantirishni maqsad qilgan.

Ushbu tajriba nafaqat ta’lim va madaniyatni rivojlantirish, balki jamiyatning intellektual salohiyatini oshirishda ham muhim ahamiyat kasb etadi. Singapur hukumati bunday rag‘batlantirish choralari orqali aholining kitobga bo‘lgan qiziqishini yangi bosqichga olib chiqishni rejalashtirmoqda.

Mutaxassislarning fikricha, moddiy rag‘bat va ma’naviy ehtiyojning uyg‘unlashuvi jamiyatda kitobxonlar safini kengaytirishga yordam beradi.