Belgiyalik talaba qurilish maydonidan yirik oltin xazinasini topdi

Belgiyaning Sint-Gillis-Dendermonde shahrida yozgi ta’til vaqtida qurilishda ishlayotgan 18 yoshli talaba kutilmaganda qiymati taxminan 9 million yevroga teng bo‘lgan yirik oltin xazinasini topib oldi. Bu haqda One.uz xabar beradi.

Sobiq pivo zavodi hududida olib borilayotgan qazish ishlari davomida aniqlangan ushbu boyliklar orasida qadimiy oltin tangalar, oltin bo‘laklari va maxsus raqamlangan quymalar mavjud. Hozirda mazkur topilma tegishli idoralar tomonidan muhofazaga olingan bo‘lib, mutaxassislar xazinaning aniq kelib chiqish tarixi va uning qonuniy merosxo‘rlarini aniqlash ustida ish olib bormoqda.

Kobe ismli talaba yozgi mehnat ta’tili davomida yangi kanalizatsiya tizimi uchun xandaq qazish ishlariga jalb qilingan edi. Ish jarayonida u hamkasblari bilan birga yer ostida yashirilgan g‘alati buyumlarga duch keladi.

Dastlab ishchilar bularni oddiy, qiymatsiz tangalar deb o‘ylashgan, biroq qazish ishlari chuqurlashgani sayin yer ostidan haqiqiy oltin quymalari va qimmatbaho ashyolar chiqa boshlagan. Xazinaning kelib chiqish tarixi O‘tkazilgan dastlabki tadqiqotlarga ko‘ra, ushbu xazina XIX asrning oxirlarida qurilgan qadimiy villaning yerto‘lasiga yashirilgan.

Boyliklar g‘isht bilan mahkam berkitilgan devor ichidagi maxsus qoplarga solingan holda saqlangan. Mazkur bino va hudud o‘z vaqtida mahalliy pivo zavodining egasi bo‘lgan badavlat tadbirkor Teofil Van Assega tegishli bo‘lgani aniqlandi.

Taxminlarga ko‘ra, oltinlar xavfsizlik nuqtai nazaridan yoki favqulodda vaziyatlar uchun ataylab yashirib qo‘yilgan bo‘lishi mumkin. Topilmaning umumiy qiymati mutaxassislar tomonidan 9 million yevro atrofida baholanmoqda.

Bu kabi yirik miqdordagi boylikning topilishi mamlakatda katta shov-shuvga sabab bo‘ldi. Ishchilar xazinani topgan zahoti mas’uliyat bilan yondashib, bu haqda darhol huquq-tartibot idoralariga xabar berishgan.

Hozirgi vaqtda oltinlar xavfsiz joyga ko‘chirilgan va davlat nazoratiga olingan. Belgiya qonunchiligiga ko‘ra, topilgan xazinaning taqdiri va uning kimga tegishli ekani masalasi sud tartibida yoki maxsus komissiya tomonidan hal qilinadi.

Agar qonuniy merosxo‘rlar topilmasa, topilmaning bir qismi uni topgan shaxslarga yoki yer egasiga berilishi mumkin. Hozirda ushbu noyob topilma bo‘yicha huquqiy va tarixiy o‘rganish jarayonlari davom etmoqda.