«Zara» brendi bolalar kiyimi tufayli navbatdagi mojarolar markazida qoldi

Dunyoga mashhur Zara brendi bolalar uchun mo‘ljallangan yangi kiyimlar to‘plami sababli navbatdagi mojarolar markazida qoldi. Bu haqda One.uz xabar beradi.

Xaridorlar va jamoatchilik faollari brendning Xellouin bayrami uchun chiqargan bolalar kostyumi Ikkinchi jahon urushi davridagi Osvensim konslageri mahbuslari kiygan formalarni eslatishini ta’kidlamoqda. Mazkur kiyimdagi vertikal chiziqlar, matoning rangi va umumiy ko‘rinishi ko‘pchilikda insoniyat tarixidagi eng mudhish davrlar bilan bog‘liq og‘riqli xotiralarni uyg‘otdi.

Kids Halloween Groom Costume deb nomlangan ushbu kiyimlar to‘plami kulrang va ko‘k rangli chiziqlardan iborat bo‘lib, kardigan hamda shortidan tashkil topgan. Tanqidchilar kiyimdagi chiziqlar va matoning eskirtirilgan ko‘rinishi mahbuslar libosiga o‘ta o‘xshash ekanini, ba’zi naqshlar esa hatto tikanli simlarni yodga solishini bildirmoqda.

Ijtimoiy tarmoq foydalanuvchilari kompaniya dizaynerlarini bunday nozik mavzuga e’tiborsizlik bilan yondashganlikda ayblab, brendni boykot qilishga chaqirmoqda. Jamoatchilikning keskin munosabati Ijtimoiy tarmoqlarda ushbu dizayn yuzasidan yuzlab norozi fikrlar qoldirildi.

Ayrim foydalanuvchilar brendning bunday qarorini tushunarsiz deb atagan bo‘lsa, boshqalar kiyimdagi detallar konslager qurbonlarining xotirasiga nisbatan hurmatsizlik ekanini qayd etgan. Shunga qaramay, ba’zi xaridorlar bu libosni shunchaki mashhur filmlardagi qahramonlar kiyimiga o‘xshatib, unda hech qanday yomon niyat ko‘rmayotganliklarini ham bildirganlar.

Isroil axborot va hujjatlash markazi rahbari Naomi Mestrum mazkur holat yuzasidan o‘z fikrini bildirib, bunday dizaynlar Xolokost qurbonlari va ularning avlodlari uchun juda og‘riqli ekanini ta’kidladi. Uning so‘zlariga ko‘ra, dizayn ortida qasddan qilingan yovuz niyat bo‘lmasligi mumkin, biroq tarixiy xotira uyg‘onishi tabiiy holatdir.

U brendni kiyimni savdodan olishga majburlamagan bo‘lsa-da, odamlarning noroziligini to‘liq qo‘llab-quvvatlashini ma’lum qildi. Takrorlanayotgan xatolar Bu Zara brendi bilan bog‘liq birinchi shunday holat emas.

Kompaniya avval ham bir necha bor shunga o‘xshash mojarolar sababli mahsulotlarini savdodan qaytarib olishga majbur bo‘lgan. Masalan, 2014-yilda brend bolalar uchun ishlab chiqarilgan chiziqli kiyimdagi yulduzsimon belgi sababli uzr so‘ragan edi.

O‘shanda ham xaridorlar ushbu yulduzni yahudiylarga majburan taqdirilgan belgiga o‘xshatishgan edi. Bundan tashqari, 2007-yilda brend sumkalaridagi naqshlar svastikani eslatgani uchun mahsulotlar savdodan yig‘ib olingan.

Ketma-ket takrorlanayotgan bunday holatlar yirik moda uylarining dizayn jarayonida tarixiy va madaniy jihatlarga naqadar e’tiborli bo‘lishi kerakligini yana bir bor ko‘rsatmoqda. Hozircha kompaniya ushbu so‘nggi holat yuzasidan rasmiy bayonot berib, kiyimni savdodan olish yoki olmaslik masalasiga aniqlik kiritgani yo‘q.