Gonkonglik taniqli model Ebbi Choy sobiq oilasi tomonidan o'ldirildi
Gonkong moda olamining yorqin vakili, taniqli model va ijtimoiy tarmoqlar yulduzi Ebbi Choy Tin-fungning o‘limi bilan bog‘liq mudhish tafsilotlar jamoatchilikni larzaga soldi. Bu haqda One.uz xabar beradi.
Mahalliy nashrlarning xabar berishicha, 28 yoshli go‘zalning hayotiga uzoq yillar davomida undan moddiy yordam olib kelgan sobiq oila a’zolari, ya’ni sobiq qaynotasi, sobiq eri va qaynog‘asi tomonidan nuqta qo‘yilgan. Ushbu shafqatsiz jinoyatning asosiy sababi sifatida Gonkong markazidagi qimmatbaho ko‘chmas mulkka egalik qilish istagi va cheksiz ochko‘zlik ko‘rsatilmoqda.
Ebbi Choy 2023-yilning fevral oyida bedarak yo‘qolgan deb e’lon qilingan edi. Oradan ko‘p o‘tmay, politsiya xodimlari shahar chekkasidagi ijara uylaridan birida modelning bo‘laklangan jasad qoldiqlarini topishdi.
Voqea joyidan jinoyat qurollari sifatida foydalanilgan elektr arra va boshqa texnik vositalar aniqlangan. Qotillikning o‘ta vahshiylik bilan sodir etilgani, hatto tajribali tergovchilarni ham hayratga soldi.
Mazkur holat yuzasidan modelning sobiq turmush o‘rtog‘i Aleks Kvong va uning yaqin qarindoshlari darhol hibsga olindi. Millionlab dollarlik mulk va adovat Tergov jarayonida ma’lum bo‘lishicha, fojiaga 7,6 million AQSH dollaridan ortiq qiymatga ega bo‘lgan hashamatli xonadon sabab bo‘lgan.
Ebbi Choy sobiq turmushidan bo‘lgan ikki nafar farzandi va sobiq qaynotasi yashashi uchun Gonkongning nufuzli tumanidan uy sotib olgan edi. Ma’muriy qulayliklar uchun mulk sobiq qaynotasining nomiga rasmiylashtirilgan, biroq model uyni sotib, oilani boshqa joyga ko‘chirishni rejalashtirganida, sobiq qarindoshlar bunga keskin qarshilik ko‘rsatishgan.
Modelning sobiq qaynotasi, o‘tmishda politsiya tizimida ishlagan Kvong Kau ushbu jinoyatning asosiy tashkilotchisi sifatida ko‘rilmoqda. U o‘g‘illari bilan til biriktirib, mulkni o‘z qo‘lida saqlab qolish uchun kelinini yo‘q qilish rejasini tuzgan.
Ular modelni aldov yo‘li bilan olib chiqib, avvaldan ijaraga olingan joyda o‘ldirishgan. Bu voqea nafaqat Gonkongda, balki butun dunyoda katta aks-sado berdi.
Moda olamidagi yorqin yulduzning so‘nishi Ebbi Choy Tin-fung xalqaro moda sanoatida o‘z o‘rniga ega bo‘lgan shaxs edi. U Vogue, Elle va L'Officiel kabi dunyoga mashhur nashrlarning muqovalarini bezagan, Parij hamda Milan moda haftaliklarining doimiy mehmoni bo‘lgan.
Uning nafaqat tashqi go‘zalligi, balki saxovatpeshaligi ham hamkasblari va muxlislari tomonidan yuqori baholanar edi. Hozirda Gonkong sudida ushbu jinoyat ishi bo‘yicha eshituvlar davom etmoqda.
Ayblanuvchilarga nisbatan eng og‘ir jazolar tayinlanishi kutilmoqda. Mazkur fojia yaqin insonlarning moddiy manfaat yo‘lida har qanday vahshiylikka qo‘l urishi mumkinligini ko‘rsatuvchi achinarli misol bo‘lib qoldi.
Dunyo hamjamiyati adolat qaror topishini va aybdorlar qonun oldida to‘liq javob berishini talab qilmoqda.
