Chilidagi Atakama cho'li kuchli yomg'irdan so'ng gullar maydoniga aylandi
Yer yuzining eng qurg‘oqchil va hayot uchun noqulay hududlaridan biri sanaladigan Chilidagi Atakama cho‘lida kutilmagan tabiat hodisasi yuz berdi. Bu haqda One.uz xabar beradi.
Frans Press axborot agentligi xabariga ko‘ra, odatda oysimon, quruq va toshloq manzaraga ega bo‘lgan bu cho‘l hududi kuchli yog‘ingarchilikdan so‘ng bepoyon gullar maydoniga aylandi. Iqlimshunoslar va botaniklar ushbu hodisani so‘nggi o‘n yilliklardagi eng yirik va hayratlanarli gullash jarayoni deb baholamoqda.
Atakama cho‘lining bunday kutilmagan ko‘rinish olishiga Tinch okeanidagi global El-Nino iqlim hodisasi sabab bo‘ldi. Joriy yilning iyul va avgust oylarida Chili shimolida misli ko‘rilmagan darajada kuchli yomg‘irlar yog‘di.
Ayrim hududlarda yog‘ingarchilik miqdori 190 millimetrgacha yetgan bo‘lib, bu o‘ta qurg‘oqchil mintaqa uchun tarixiy va ilgari hech qachon kuzatilmagan ko‘rsatkich hisoblanadi. Millionlab urug‘larning hayotga qaytishi Atakama bioxilma-xillikni muhofaza qilish xizmati mutaxassislarining ta’kidlashicha, qalin tuproq va qum qatlamlari ostida o‘nlab yillar davomida uxlab yotgan millionlab urug‘lar hamda piyozchalar namlik ta’sirida uyg‘ongan.
Ba’zi o‘simlik turlari yer ostida 30-40 yil davomida o‘zining qulay fursatini kutib yotgani aniqlangan. Natijada, qisqa muddat ichida sahroda 200 dan ortiq yovvoyi o‘simlik turlari unib chiqib, ufqqa qadar cho‘zilgan oq, sariq va siyohrang gullar gilamini hosil qildi.
Mutaxassislarning fikricha, joriy yildagi tabiat hodisasi so‘nggi 30 yillikning mutlaq rekordiga aylanishi mumkin. Cho‘lning ayrim tog‘ tizmalari va tepaliklarida oxirgi 40 yil ichida birorta yashil giyoh ko‘rinmagan edi.
Bugungi kunda esa ushbu hududlar to‘liq rang-barang tus olgan. Tabiatning bu noyob mo‘jizasi dunyo bo‘ylab sayyohlar e’tiborini tortmoqda va minglab kishilar ushbu manzarani ko‘rish uchun Chili shimoliga oqib kelmoqda.
Gullash davrining eng yuqori nuqtasi Chili milliy o‘rmon korporatsiyasi prognozlariga ko‘ra, gullagan cho‘l hodisasi aynan oktyabr oyida o‘zining eng yuqori cho‘qqisiga chiqadi. Kuzatuvchilarning hisob-kitoblariga ko‘ra, yaqin kunlarda kamida 15 ming gektar sahro maydoni butunlay yashil va gulli landshaftga aylanadi.
Ushbu noyob go‘zallik uzoq davom etmaydi. Quyosh nuri ta’sirida suv to‘liq bug‘lanib ketishi bilan o‘simliklar yana qurib qoladi va urug‘lar keyingi yirik yog‘ingarchilikka qadar o‘n yillab davom etishi mumkin bo‘lgan uyquga ketadi.
Hozirda mutaxassislar ushbu qisqa muddatli mo‘jizani ilmiy jihatdan o‘rganish va uni saqlab qolish choralarini ko‘rishmoqda.
