Irkutskda laboratoriya xodimi o‘limi yuzasidan JSST xulosasi e’lon qilindi
Rossiyaning Irkutsk viloyatida o‘latga qarshi ilmiy-tadqiqot markazi xodimasining o‘limi bilan bog‘liq vaziyat yuzasidan Jahon sog‘liqni saqlash tashkiloti o‘z xulosalarini e’lon qildi. Bu haqda One.uz xabar beradi.
Tashkilot bergan ma’lumotga ko‘ra, mazkur hodisa ortidan kasallik keng tarqalishi xavfini tasdiqlovchi hech qanday dalil aniqlanmagan. Laboratoriyada ishlagan yosh mutaxassisning pnevmoniya sababli vafot etishi xalqaro miqyosda xavotirlarga sabab bo‘lgan edi, biroq o‘tkazilgan tekshiruvlar xavfli patogenlar mavjud emasligini ko'rsatdi.
Voqea tafsilotlariga ko‘ra, 28 yoshli laboratoriya xodimi Darya Shipilova 2-oktabr kuni noma’lum sababli pnevmoniya oqibatida hayotdan ko‘z yumgan. Mazkur holatdan so‘ng Rossiya rasmiy idoralari ehtiyot chorasi sifatida marhuma bilan bevosita muloqotda bo‘lgan qariyb 200 kishini zudlik bilan karantinga olgan edi.
Ushbu chora-tadbirlar yuzaga kelishi mumkin bo‘lgan yuqumli kasallik o‘choqlarining oldini olish maqsadida amalga oshirilgan. Tekshiruv natijalari va tibbiy xulosalar Jahon sog‘liqni saqlash tashkiloti marhuma va u bilan aloqada bo‘lgan barcha shaxslardan olingan tahlil natijalari manfiy chiqqanini ma’lum qildi.
Tekshirilgan barcha xavfli mikroorganizmlar bo‘yicha natijalar kasallik yo‘qligini tasdiqlagan. Shuningdek, nazoratga olingan fuqarolarning hech birida kasallik alomatlari yoki og‘ir pnevmoniya holatlari kuzatilmagan.
Bu esa hududda epidemiologik vaziyat barqaror ekanidan dalolat beradi. Hozirgi vaqtda asosiy noaniqlik marhumaning o‘limiga aynan qaysi omil sabab bo‘lgani bilan bog‘liq bo‘lib qolmoqda.
Rossiya sog‘liqni saqlash organlari mutaxassis barcha zaruriy emlashlardan o‘tganini va uning organizmida laboratoriya faoliyatiga aloqador bo‘lgan patogenlar topilmaganini ta’kidlamoqda. 8-oktabr holatiga ko‘ra, marhuma bilan muloqotda bo‘lgan shaxslarni tibbiy kuzatish jarayonlari to‘liq yakunlangan.
Jahon sog‘liqni saqlash tashkiloti vaziyatni diqqat bilan kuzatishda davom etmoqda, biroq hozircha Rossiya hududida o‘lat yoki boshqa o‘ta xavfli yuqumli kasalliklar tarqalayotganini tasdiqlovchi birorta asos mavjud emas. Mutaxassislar aholini ortiqcha xavotirga tushmaslikka va faqat rasmiy ma’lumotlarga tayanishga chaqirmoqda.
