Britaniyalik sayyoh 28 yillik piyoda sayohatidan so'ng vataniga qaytdi
Britaniyalik 57 yoshli sayyoh Karl Bushbi 28 yil davom etgan mislsiz sayohatidan so‘ng nihoyat o‘z vataniga qaytib keldi. Bu haqda One.uz xabar beradi.
U 1998-yilning noyabr oyida Chili janubidan boshlagan safarida jami 50 ming kilometrdan ortiq masofani faqat piyoda yurib va suv havzalarini suzib o‘tgan holda bosib o‘tdi. Dunyoning 29 ta davlatini kesib o‘tgan Bushbi o‘z oldiga qo‘ygan asosiy shartga ko‘ra, hech qanday transport vositasidan foydalanmadi.
Uning bu matonati va irodasi zamonaviy sayohat tarixidagi eng uzoq davom etgan va murakkab yurishlardan biri sifatida baholanmoqda. Xavfli hududlar va mislsiz dovonlar Bushbi o‘z safari davomida tabiatning eng og‘ir sinovlari va inson omili bilan bog‘liq xavf-xatarlarga duch keldi.
U Kolumbiyadagi qurolli to‘qnashuvlar avj olgan pallada o‘tib bo‘lmas Dariyen darasini piyoda kesib o‘tishga muvaffaq bo‘ldi. Shuningdek, u insoniyat tarixida Bering bo‘g‘ozini sharqdan g‘arbga qarab, muzlar ustida piyoda bosib o‘tgan birinchi shaxsga aylandi.
Sayyohning jasorati faqat quruqlik bilan cheklanib qolmay, u Kaspiy dengizida 296 kilometr masofani suzib o‘tib, o‘ziga xos rekord o‘rnatdi. Sayohatning yakuniy va eng ramziy bosqichlaridan biri La-Mansh bo‘g‘ozini suzib o‘tish bo‘ldi.
Karl Bushbi 5-oktabr kuni Fransiya qirg‘og‘idan yo‘lga chiqib, Angliyaning Duvr shahriga yetib keldi. Uch kun davom etgan ushbu suzish jarayoni jami 20 soat vaqtni oldi.
Sohilda uni yaqinlari, oila a’zolari hamda uning hayoti haqida hujjatli film suratga olayotgan mashhur rejissyor Verner Gersog katta hayajon bilan kutib oldi. Sobiq desantchi bo‘lgan sayyoh barcha zaruriy ashyolarini o‘zi bilan birga maxsus aravachada tortib yurgan.
Kutilmagan to‘siqlar va qat’iyat Dastlabki rejalarga ko‘ra, ushbu ulkan sayohat 12 yil ichida yakunlanishi lozim edi. Biroq hayotiy vaziyatlar, jumladan, turli davlatlardagi viza muammolari, 2008-yildagi jahon iqtisodiy inqirozi va butun dunyoni qamrab olgan koronavirus pandemiyasi safar muddatini qariyb uch barobarga uzaytirib yubordi.
Xususan, Rossiya rasmiylari bilan bog‘liq viza cheklovlari sayyohni bir necha yil davomida to‘xtab qolishga majbur qildi. Ammo bu qiyinchiliklarning hech biri uni o‘z ahdidan qaytara olmadi.
Hozirda Karl Bushbi Angliya tuprog‘ida bo‘lsa-da, uning safari hali to‘liq nihoyasiga yetgani yo‘q. U o‘zining tug‘ilib o‘sgan shahri — Hallga yetib borish uchun yana 400 kilometrga yaqin masofani piyoda bosib o‘tishi kerak.
Sayyoh o‘z oldiga qo‘ygan "belgilangan manzilga o‘z kuchi bilan yetib bormasdan ortga qaytmaslik" shartiga oxirigacha sodiq qolishni maqsad qilgan. Uning bu sayohati inson irodasining naqadar cheksiz ekanligini butun dunyoga isbotlab berdi.
