Kolumbiyada ayol dunyoda kam uchraydigan to'rt egizakni kutmoqda
Kolumbiyada 38 yoshli Mariya Tapia bir vaqtning o‘zida to‘rt nafar bir xil o‘g‘il farzandni dunyoga keltirish arafasida turibdi. Bu haqda One.uz xabar beradi.
Tibbiyot mutaxassislarining ta’kidlashicha, bunday homiladorlik dunyo miqyosida nihoyatda kam uchraydi va taxminan har 15 million holatdan birida kuzatilishi mumkin. Hozirda homiladorlikning 30-haftasida bo‘lgan ona shifokorlar nazorati ostida bo‘lib, chaqaloqlarga Mariano, Maksimiliano, Emiliano va Tiago deb ism qo‘yish rejalashtirilgan.
Ushbu noyob voqea nafaqat Kolumbiyaning Antiokiya departamenti, balki butun dunyo tibbiyot olami e’tiborini tortmoqda. Mariya va uning turmush o‘rtog‘i Jonatan Sapa ayni paytda Medelin shahriga yetib kelishgan.
Bu yerda tajribali mutaxassislar chaqaloqlarni qachon va qaysi usulda dunyoga keltirish xavfsiz ekanini aniqlash ustida ish olib bormoqda. Homiladorlik yuqori xavfli guruhga mansub deb baholangani sababli, ona va hali tug‘ilmagan go‘daklarning salomatligi doimiy kuzatuv ostiga olingan.
To‘rtala chaqaloq ham bir xil jinsda Dastlabki tibbiy tekshiruvlar natijasiga ko‘ra, chaqaloqlar monozigotali to‘rt homila hisoblanadi. Bu shuni anglatadiki, ular bitta urug‘langan tuxum hujayrasidan rivojlangan va keyinchalik u to‘rtta alohida embrionga ajralgan.
Bunday holatda tug‘iladigan bolalar bir-biriga suv tomchisidek o‘xshash bo‘ladi. Jonatan mahalliy ommaviy axborot vositalariga bergan intervyusida to‘rtala o‘g‘lining bitta platsentada, biroq alohida homila qoplarida joylashganini ma’lum qildi.
Uning aytishicha, aynan mana shu jihat homiladorlikni favqulodda noyob va murakkab qiladi. Juftlik dastlab to‘rt nafar farzand kutayotganini bilganida, hayratdan nima deyishni ham bilmay qolgan.
Ota ultratovush tekshiruvi vaqtida embrionlarni birma-bir sanagan daqiqalarini hayajon bilan eslaydi. Ona farzandlarini bag‘riga bosishni intiqlik bilan kutmoqda Oila homiladorlik jarayonini shifokorlar yordamida imkon qadar uzoqroq davom ettirishga harakat qilmoqda.
Bu chaqaloqlarning tug‘ilishidan oldin ona qornida yetarli darajada rivojlanishi uchun juda muhimdir. Mariya o‘z videomurojaatida farzandlarini ko‘rishni va ularni bag‘riga bosishni juda xohlayotganini bayon qildi.
Hozirda onaning umumiy ahvoli barqaror bo‘lsa-da, qorni kattalashib borayotgani sababli harakatlanish va yurish tobora qiyinlashmoqda. Shunga qaramay, Mariya va Jonatan farzandlarining dunyoga kelishini katta quvonch hamda umid bilan kutishmoqda.
Ular bu hodisani Yaratgan tomonidan berilgan buyuk ne’mat deb bilishadi. Mutaxassislarning fikricha, to‘rt nafar chaqaloqni bir vaqtda ko‘tarish ona organizmi uchun katta yuk hisoblanadi.
Shu sababli tug‘ruq vaqti va usulini belgilashda shifokorlar har bir omilni, jumladan, bolalarning vazni va rivojlanish darajasini sinchiklab o‘rganishmoqda. Akusher-ginekolog Eylen Ospina Barrios bu kabi holatlarning dunyo tibbiyotida juda kam uchrashini va alohida yondashuv talab etishini ta’kidladi.
