Yandeks kompaniyasi jiddiy inqiroz tufayli to'liq to'xtab qolish xavfi ostida turibdi
Rossiyaning yirik texnologik korxonasi hisoblangan Yandeks kompaniyasi o‘z faoliyatidagi eng og‘ir inqirozli davrni boshdan kechirmoqda. Bu haqda One.uz xabar beradi.
Soha mutaxassislarining xulosalariga ko‘ra, kompaniyaning ma’lumotlarni qayta ishlash markazlariga yetkazilgan jiddiy zararlar tizimni o‘ta nozik holatga keltirib qo‘ygan. Hozirgi kunda infratuzilma quvvatlarining keskin kamayib ketishi natijasida, agar yana bitta ma’lumotlar markazi ishdan chiqadigan bo‘lsa, Yandeks ekotizimidagi barcha xizmatlar va platformalar faoliyati butunlay to‘xtab qolishi xavfi mavjud.
Ushbu holat kompaniyaning o‘nlab yo‘nalishdagi raqamli xizmatlari uzluksizligini ta’minlash imkoniyatini deyarli yo‘qqa chiqarmoqda. Moliya tizimidagi uzilishlar va foydalanuvchilarning talofatlari Ma’lumotlar markazlaridagi texnik nosozliklar birinchi navbatda millionlab mijozlarga ega bo‘lgan Yandeks Pey moliyaviy xizmati ishiga salbiy ta’sir ko‘rsatdi.
Tizimdagi yirik uzilishlar oqibatida ko‘plab fuqarolarning hisobraqamlari va bank kartalaridagi mablag‘lari muzlatib qo‘yildi. Natijada foydalanuvchilar o‘z pullarini boshqarish va ulardan foydalanish imkoniyatidan mahrum bo‘lishdi.
Bir necha kundan buyon davom etayotgan ushbu bloklanish holati tufayli o‘z jamg‘armalarini to‘liqligicha mazkur tizimda saqlagan shaxslar og‘ir moliyaviy vaziyatga tushib qolishgan. Foydalanuvchilar ijtimoiy tarmoqlar orqali kundalik ehtiyojlar, jumladan, oziq-ovqat mahsulotlarini xarid qilish uchun ham mablag‘siz qolganliklari haqida ko‘plab shikoyatlar bildirishmoqda.
Tizimga kirish imkoniyati cheklangani sababli mablag‘larni naqdlashtirish yoki boshqa hisoblarga o‘tkazishning imkoni bo‘lmayapti. Kredit va ipoteka to‘lovlari bilan bog‘liq muammolar Moliyaviy xizmatlarning to‘xtab qolishi foydalanuvchilar uchun nafaqat kundalik qiyinchiliklarni, balki jiddiy huquqiy va iqtisodiy xavflarni ham keltirib chiqardi.
Eng asosiy muammolardan biri sifatida mijozlarning boshqa tijorat banklari oldidagi majburiyatlarini bajara olmayotgani ko‘rilmoqda. Xususan, ipoteka va iste’mol kreditlari bo‘yicha oylik to‘lovlarni o‘z vaqtida amalga oshirish imkoniyati yo‘qolgan.
Mablag‘lar tizim ichida qolib ketganligi sababli bank to‘lovlari muddatlari buzilmoqda. Bu esa mijozlarga nisbatan banklar tomonidan jarimalar qo‘llanilishi, foizlar o‘sishi va kredit tarixining yomonlashishiga olib kelishi mumkin.
Hozirda texnologik gigant tizim barqarorligini tiklash va infratuzilmaning to‘liq qulashini oldini olish uchun favqulodda choralar ko‘rmoqda. Biroq kompaniyaning kelgusi faoliyati va foydalanuvchilar oldidagi majburiyatlarining bajarilishi saqlanib qolgan ma’lumotlar markazlarining xavfsizligiga bevosita bog‘liq bo‘lib turibdi.
