Germaniya minglab suriyaliklarni qochqinlik maqomidan mahrum etmoqda

Germaniya hukumati mamlakatda istiqomat qilayotgan minglab suriyalik fuqarolarni qochqinlik maqomidan mahrum etish va ularni o‘z vataniga majburiy tartibda qaytarish jarayonini boshladi. Bu haqda One.uz xabar beradi.

Germaniyaning nufuzli nashrlari tarqatgan ma’lumotlarga ko‘ra, Migratsiya va qochqinlar bo‘yicha federal idora sentyabr oyida ko‘plab suriyaliklarga ularning huquqiy maqomi bekor qilingani hamda deportatsiya qilish uchun hech qanday to‘siq qolmagani haqida rasmiy bildirishnomalar yuborgan. Rasmiy Berlin ushbu keskin qarorni Suriyadagi siyosiy va harbiy vaziyatning tubdan o‘zgargani hamda endilikda fuqarolarning u yerga qaytishi xavfsiz ekani bilan izohlamoqda.

Kimlar birinchi navbatda deportatsiya qilinadi? Federal idora qarori bilan qochqinlik maqomidan mahrum etiladigan shaxslar toifasi aniq belgilab olindi.

Maxsus ogohlantirish xatlari birinchi navbatda politsiya nazoratiga tushgan, jinoyat yoki turli huquqbuzarliklar sodir etgan hamda Germaniyadan vaqtincha chiqib, yana qaytib kelgan suriyaliklarga yuborilmoqda. Yuborilgan rasmiy hujjatlarda shaxsga berilgan qochqinlik maqomi bekor qilingani, unga qayta qo‘shimcha himoya berilmasligi hamda qonun doirasida mamlakatdan chiqarib yuborishga monelik yo‘qligi alohida ta’kidlangan.

Bunday qaror qabul qilingan shaxslar Germaniya hududida qonuniy qolish va davlat tomonidan beriladigan ijtimoiy imtiyozlardan foydalanish huquqidan butunlay mahrum bo‘ladi. Suriyadagi yangi siyosiy voqelik Germaniya migratsiya idorasi ushbu choralarni Suriyadagi yangi geosiyosiy vaziyat bilan asoslamoqda.

2024-yilning oxiriga kelib Bashar Asad rejimi qulashi natijasida ko‘p yillik fuqarolar urushi rasman yakunlandi. Hozirda mamlakatning katta qismi xalqaro hamjamiyat tomonidan tan olingan o‘tish davri hukumati nazoratiga o‘tgan.

Birlashgan Millatlar Tashkilotining ma’lumotlariga ko‘ra, rejim o‘zgarganidan buyon bir yarim milliondan ortiq suriyalik o‘z ixtiyori bilan vataniga qaytib bo‘lgan. Garchi ayrim hududlarda qurolli guruhlar bilan bog‘liq xavflar saqlanib qolayotgan bo‘lsa-da, ular amaldagi davlat tuzilmasiga jiddiy tahdid solmasligi qayd etilmoqda.

Bu esa qochqinlarning o‘z yurtiga qaytishi uchun yetarli asos bo‘lib xizmat qilmoqda. Iqtisodiy samaradorlik va siyosiy maqsadlar Suriyalik qochqinlarni vataniga qaytarish Germaniyaning yangi rahbariyati uchun ustuvor vazifaga aylangan.

Ayni paytda mamlakatda 900 mingdan ortiq suriyalik yashayotgan bo‘lsa, ularning qariyb yarmi bevosita davlat budjeti hisobidan ijtimoiy nafaqa oladi. Hukumat rejasiga ko‘ra, kelgusida qochqinlarning kamida 80 foizini bosqichma-bosqich vataniga qaytarish ko‘zda tutilgan.

Mutaxassislarning hisob-kitoblariga ko‘ra, ushbu deportatsiya jarayoni muvaffaqiyatli amalga oshirilsa, Germaniya davlat g‘aznasi yiliga 6 milliard yevro atrofida mablag‘ni tejab qolish imkoniyatiga ega bo‘ladi. Mazkur keng ko‘lamli tashabbus nafaqat iqtisodiy, balki mamlakatdagi migratsiya inqirozini yumshatishga qaratilgan muhim siyosiy qadam sifatida baholanmoqda.