AQSHda grin karta uchun arizalar qabul qilish muddati belgilandi
Amerika Qo‘shma Shtatlarida yashash va ishlash huquqini beruvchi Turli millatlar uchun viza lotereyasi, ya’ni Green Card dasturining navbatdagi bosqichi bo‘yicha aniqlik kiritildi. Bu haqda One.uz xabar beradi.
AQSH federal sudi mamlakat Davlat departamentiga DV-2027 lotereyasini o‘tkazish majburiyatini yukladi. Sud qaroriga ko‘ra, arizalarni qabul qilish jarayoni joriy yilning 1-noyabridan kechiktirmasdan boshlanishi va g‘oliblar ro‘yxati 3-dekabrga qadar e’lon qilinishi shart.
Ushbu qaror lotereya atrofidagi turli tushunmovchiliklarga chek qo‘yib, millionlab talabgorlarga ro‘yxatdan o‘tish uchun rasmiy imkoniyat yaratmoqda. Federal sud lotereya jarayonini tashkil etish bo‘yicha qat’iy muddatlarni belgilab berdi.
Unga ko‘ra, arizalarni ro‘yxatdan o‘tkazish jarayoni 30 kun davom etadi. Bu muddat ichida nomzodlar o‘z ma’lumotlarini maxsus platformaga kiritishlari lozim.
Mazkur tartib Davlat departamenti tomonidan belgilangan texnik talablarga muvofiq amalga oshiriladi. G‘oliblarni aniqlash jarayoni ham tezlashtirilgan bo‘lib, natijalar dekabr oyining boshida ma’lum qilinishi ko‘zda tutilgan.
DV-2027 lotereyasidagi asosiy o‘zgarishlar Bu yilgi tanlovda ishtirokchilar uchun bir qator yangi talablar joriy etilishi kutilmoqda. Eng muhim yangiliklardan biri shundaki, lotereyada qatnashish uchun 1 AQSH dollari miqdorida ramziy to‘lov undirilishi nazarda tutilgan.
Bu chora ro‘yxatdan o‘tish jarayonini tartibga solish va tizimga bo‘lgan ortiqcha yuklamani kamaytirishga xizmat qilishi aytilmoqda. Shu bilan birga, ariza topshiruvchilarning shaxsini tasdiqlash talablari ham kuchaytirilgan.
Nomzodlar uchun xorijga chiqish pasportiga ega bo‘lish majburiy shart sifatida belgilandi. Ariza topshirish vaqtida amal qilish muddati tugamagan chet elga chiqish pasportining elektron nusxasi bo‘lishi talab etiladi.
Ushbu hujjat mavjud bo‘lmagan taqdirda, tizim arizani qabul qilmasligi yoki keyinchalik nomzodning natijalari bekor qilinishi mumkin. Shu sababli, mutaxassislar talabgorlarga hujjatlarni oldindan taxt qilib qo‘yishni tavsiya etmoqda.
Rasmiy manbalarga tayanish muhim Lotereyaga ariza topshirishning aniq boshlanish sanasi va batafsil texnik yo‘riqnomalar tez orada AQSH Davlat departamentining rasmiy veb-sahifalarida e’lon qilinadi. Hozirgi vaqtda turli norasmiy manbalar va ijtimoiy tarmoqlarda tarqalayotgan yolg‘on ma’lumotlardan ehtiyot bo‘lish zarur.
Firibgarlar ko‘pincha lotereyada yordam berishni va’da qilib, fuqarolarning shaxsiy ma’lumotlarini yoki mablag‘larini o‘zlashtirishga urinishadi. Eslatib o‘tamiz, Green Card lotereyasi faqatgina rasmiy davlat portali orqali amalga oshiriladi.
Har qanday qo‘shimcha to‘lovlar yoki xizmatlar lotereyaning asosiy qoidalariga zid bo‘lishi mumkin. Talabgorlar ro‘yxatdan o‘tish jarayonida kiritilgan barcha ma’lumotlarning aniqligi va to‘g‘riligi uchun shaxsan javobgar hisoblanadilar.
Noto‘g‘ri ma’lumot taqdim etish, hatto g‘olib bo‘lgan taqdirda ham, viza olish huquqidan mahrum etilishga olib keladi.
