Tramp Putinning urushni to‘xtatmasligini tanqid qildi
AQSH prezidenti Donald Tramp Rossiya va Ukraina o‘rtasidagi urushni to‘xtatish bo‘yicha olib borilayotgan muzokaralar doirasida Vladimir Putinga nisbatan tanqidiy fikrlarni bildirdi. Bu haqida Zamin.uz xabar berdi.
Trampning aytishicha, Rossiya prezidenti bilan muloqotlarda doimo xushmuomala munosabatda bo‘lishiga qaramay, bu suhbatlardan hech qanday ijobiy natija olinmayapti. Prezidentning so‘zlariga ko‘ra, urush davom etayotgan bir paytda ko‘plab odamlar halok bo‘lmoqda va bu holat darhol to‘xtatilishi zarur.
Tramp Putinning gaplari ko‘pincha samarasiz va behuda ekanligini ta’kidladi. U, shuningdek, Rossiya-Ukraina masalasida oxirgi telefon muloqotlari ham hech qanday ijobiy o‘zgarishlarga olib kelmaganini bildirdi.
Siyosatchi Rossiya rahbari bilan muloqot qilishga tayyorligini, biroq Putinning urushni to‘xtatishga jiddiy yondashmayotganini qayd etdi. Shuningdek, Tramp senator Lindsi Grem tomonidan taqdim etilgan Rossiyaga qarshi yangi sanksiyalar to‘g‘risidagi qonun loyihasini jiddiy ko‘rib chiqayotganini ma’lum qildi.
U bu borada kichik bir syurpriz tayyorlashini aytib, jurnalistlarga murojaat qildi. Ma’lumot o‘rnida, aprel oyida taqdim etilgan sanksiyalar paketida Rossiya bilan savdo qiluvchi va Ukrainaga yordam bermaydigan davlatlardan kelayotgan tovarlarga 500 foizlik boj joriy etish taklif qilingan.
Ushbu tashabbus 100 nafar senatorning 80 dan ortig‘i tomonidan qo‘llab-quvvatlangan. Sizningcha, Trampning bu tanqidiy fikrlari Moskva bilan AQSH munosabatlariga qanday ta’sir ko‘rsatishi mumkin?
