BBC sharhlovchisining ism xatosi jamoatchilikning noroziligiga sabab bo‘ldi. Bu haqida Zamin.uz xabar berdi.
Uimbldon musobaqasi davomida BBC’ning tajribali sharhlovchisi Endryu Kasl Amerika futboli yulduzi Triniti Rodmanning ismini bir necha bor “Tiffani” deb noto‘g‘ri atadi. Bu xato keng jamoatchilik tomonidan keskin tanqid qilindi va Kasl kechirim so‘rashga majbur bo‘ldi.
23 yoshli Olimpiada chempioni va AQSh ayollar milliy terma jamoasi futbolchisi Triniti Rodman o‘zining Instagram sahifasida ushbu holatga munosabat bildirdi. U ismim Triniti, Tiffani emas, deb aniq ta’kidladi.
Shuningdek, Rodman hozirda Uimbldonda ishtirok etayotgan amerikalik tennischi Ben Sheltonning rafiqasi ekanligini ma’lum qildi. U Sheltonning Italiyalik raqibi Lorenso Sonegoga qarshi o‘yinida tribunada qo‘llab-quvvatlovchilar qatorida bo‘ldi.
Masala faqat ism xatosida emas. Sharh paytida Kasl Rodmanning otasi Dennis Rodmanni NBA tarixidagi eng yaxshi riboundchi va biroz qattiq xarakterli shaxs deb ta’rifladi.
Bu fikrga javoban Rodman otasi hayotida yo‘q ekanligini va bunday paytlarda uni eslashning keragi yo‘qligini bildirdi. U Ben va uning oilasi uchun hurmatni saqlashni so‘radi.
Endryu Kasl ilgari ham ba’zi bahsli sharhlari bilan tanilgan. 2016 yilda u Britaniyalik tennischi Markus Uillisning qiz do‘sti haqidagi fikri jinsiy kamsitish deb qabul qilingan, 2022 yilda esa sudlangan tennis yulduzi Boris Bekkerni Uimbldonga qaytishi haqida gapirgani uchun tanqidga uchragan.
BBC matbuot kotibi Endryu Kaslning Triniti Rodmanning ismini noto‘g‘ri aytganligi uchun uzr so‘raganini ma’lum qildi. Jamoatchilik orasida hurmat va ehtiyotkorlik talab qilinishi ta’kidlandi.
