Birkin sumkasi Parijda rekord narxda sotildi
Parijdagi Sotheby’s kimoshdi savdosida original Birkin sumkasi rekord darajadagi narxda, ya’ni 10,1 million AQSH dollariga sotildi. Bu haqida Zamin.uz xabar berdi.
Bu tarixdagi eng qimmat qo‘l sumkasi savdosi bo‘lib, moda sohasida yangi cho‘qqini belgiladi. Ushbu qora charm sumka 1985-yilda mashhur britan-fransuz san’atkori Jane Birkin uchun ishlab chiqilgan.
Hikoyaga ko‘ra, Jane Birkin samolyotda Hermes moda uyi rahbari bilan birga uchayotganida, uning sumkasidan buyumlari to‘kilib ketadi. Shundan so‘ng, Hermes bosh direktori unga yanada amaliy va kengroq sumka yaratish g‘oyasini taklif qiladi.
Bu g‘oya qog‘ozga chizilgan eskiz shaklida bo‘lgan. O‘sha eskiz asosida tayyorlangan birinchi prototip sumka Jane Birkinga topshirilganidan keyin, butun dunyo bo‘ylab mashhur “Birkin” brendining paydo bo‘lishiga asos bo‘ldi.
Ushbu noyob prototip sumka 2025-yil iyul oyida Parijdagi Sotheby’s savdosida Yaponiyalik xususiy kolleksioner tomonidan sotib olindi. Savdo davomida 10 daqiqa ichida 9 nafar qat’iyatli xaridor o‘rtasida qizg‘in raqobat yuz berdi.
Oldingi eng yuqori narx 515,5 ming AQSH dollari bo‘lgan bo‘lsa, yangi narx bu ko‘rsatkichni deyarli 20 barobar oshirdi. Sotheby’sning moda va sumkalar bo‘yicha global rahbari Morgane Halimi bu rekord narxni “afsonaning kuchi” deb ta’rifladi.
Uning so‘zlariga ko‘ra, Birkin sumkasi zamonaviy modaning eng mashhur belgilaridan biri bo‘lib, nafaqat noyob dizayni, balki o‘ziga xos tarixiy ahamiyatga ham ega. Sumka bir necha egasini almashtirgan, unda Jane Birkinning bosh harflari, yelkama tasmasi, doimo osib yuradigan tirnoq qirqgichi hamda UNICEF va Medecins du Monde tashkilotlariga oid stikerlar saqlanib qolgan.
Jane Birkin ushbu sumkani o‘n yil ishlatgan va 1994-yilda OITSga qarshi xayriya auktsioniga hadya qilgan. Keyinchalik sumka Parijdagi hashamatli butik egasi Catherine Benier tomonidan sotib olinib, 25 yil davomida saqlangan.
Hozirgi kunda Birkin sumkalari yuqori mavqega ega bo‘lib, ularga ega bo‘lish uchun ko‘pincha yillab navbat kutish talab etiladi. Mashhur yulduzlar, jumladan Victoria Beckham, Kate Moss va Jennifer Lopez, bunday sumkalarning faxrli egalari hisoblanadi.
Ushbu tarixiy savdo nafaqat Birkin sumkasining modadagi o‘rnini, balki kolleksionerlar orasidagi qiymatini ham yana bir bor tasdiqladi.
