Netanyaxu: Eron yadroviy qurolga ega bo‘lmoqda
Isroil bosh vaziri Binyamin Netanyaxu Eronning yadroviy qurolga ega bo‘lishi mintaqa uchun jiddiy tahdid ekanligini ta’kidladi. Bu haqida Zamin.uz xabar berdi.
U The Jerusalem Post nashriga bergan intervyusida Eron Islom inqilobi qo‘riqchilari korpusi boyitilgan uranni yadroviy qurolga aylantirish uchun faol harakat qilayotganini ma’lum qildi. Netanyaxuning so‘zlariga ko‘ra, Hizbullohning zaiflashuvi fonida Eron yadroviy qurolga ega bo‘lish jarayonini tezlashtirmoqda.
Ular bir yil ichida atom bombasiga ega bo‘lishi va undan amalda foydalanishi mumkinligini aytdi. Shuningdek, Netanyaxu HAMAS tomonidan G‘azoda asirga olingan odamlar haqida ham gapirdi.
U Isroil tinch aholini himoya qilish uchun barcha imkoniyatlarni ishga solayotganini, ammo HAMAS aynan tinch aholini nishonga olayotganini bildirdi. Ma’lumot uchun, Netanyaxu 1995 yildan buyon Eronning yadroviy qurolga ega bo‘lishi haqida ogohlantirib kelmoqda.
Biroq AQSh razvedkasi va Xalqaro Atom Energetikasi Agentligi (MAGATE) Eron yadroviy qurol ishlab chiqarayotgani haqida aniq dalil topmagan. MAGATE rahbari Rafael Grossi siyosatchi emasligini va bunday muhim bayonot uchun mustahkam faktlar talab qilinishini ta’kidladi.
13 iyundan boshlab Isroil Eron hududidagi yadroviy infratuzilma, mudofaa obyektlari hamda yuqori lavozimli harbiy va ilmiy xodimlarga qarshi hujumlarni amalga oshirdi. Eron sog‘liqni saqlash vazirligi ma’lumotiga ko‘ra, bu hujumlar natijasida kamida 627 kishi halok bo‘lgan, ular orasida tinch aholi ham bor.
22 iyun kuni AQSh ham ushbu operatsiyaga qo‘shilib, Fordo, Natanz va Isfahondagi strategik obyektlarga aviazarbalar berdi. Hujumda maxsus bunker bombalari ishlatilgan.
Markaziy razvedka boshqarmasi rahbari Jon Retkliff operatsiya Eron yadroviy dasturiga katta zarba berganini aytdi. Keyinchalik Donald Tramp Isroil va Eron o‘rtasida o‘t ochishni to‘xtatish bo‘yicha kelishuvga erishilganini e’lon qildi.
Bu kelishuv har ikki davlat tomonidan tasdiqlandi. Shu bilan birga, Eron rasmiylari Amerika zarbalari katta yo‘qotishga olib kelmaganligini bildirgan.
Oliy rahbar Ali Xomanaiy esa mamlakat Vashington va Tel-Aviv ustidan “moral g‘alaba” qozonganini ma’lum qildi. 25 iyun kuni Eron parlamenti MAGATE bilan hamkorlikni to‘xtatish to‘g‘risida qaror qabul qildi.
2 iyul kuni esa Prezident Mas’ud Pezeshkiyon ushbu qarorni rasman imzoladi.
