Surx-Digorada 90 yoshdan oshgan 18 fuqaro yashaydi
Surx-Digora Rossiya Federatsiyasi tarkibidagi Severnaya Osetiya-Alaniya Respublikasida joylashgan kichik qishloqdir. Bu haqida Zamin.uz xabar berdi.
Ushbu qishloq Rossiya Rekordlar kitobiga uzoq umr ko‘ruvchilar soni bo‘yicha kiritilgan. Hozirda bu yerda 90 yoshdan oshgan 18 nafar fuqaro istiqomat qilmoqda.
Eng keksa fuqaro Sonya Xadziretovna Arkayeva bo‘lib, u 1927 yil 10 fevralda tug‘ilgan va hozirda 98 yoshda, jismonan faol hayot kechirmoqda. Eng yosh uzoq umr ko‘ruvchi esa 90 yoshli Sergey Nikolayevich Sakiyev bo‘lib, u 1935 yil 1 iyulda tavallud topgan.
Rossiya Rekordlar kitobining rasmiy saytida har bir uzoq umr ko‘ruvchining ismi va surati e’lon qilingan. Surx-Digora qishlog‘i ilgari ham bu borada rekord o‘rnatgan bo‘lib, 2021 yilda 17 nafar keksa fuqaro bilan ro‘yxatga kiritilgan edi.
Mahalliy mutaxassislar va shifokorlarning fikriga ko‘ra, uzoq umr ko‘rishning asosiy sabablari quyidagilardan iborat: sog‘lom muhit va tabiiy ovqatlanish, yuqori jismoniy faollik — keksalar uy ishlarida va bog‘dorchilikda faol ishtirok etadi, sog‘lom ijtimoiy muhit — yoshlar keksa avlodga hurmat bilan qaraydi, ularning tajribasiga tayanadi, shuningdek, stress darajasining pastligi va tabiiy hayot tarzi ham uzoq umr ko‘rishga ijobiy ta’sir ko‘rsatadi. Bu omillar Surx-Digora aholisi orasida uzoq umr ko‘rish darajasining yuqori bo‘lishiga sabab bo‘lmoqda.
