O‘zbekistonlik 66 nafar rossiyalik askar halok bo‘ldi

Ukrainaga qarshi olib borilayotgan urushda Rossiya armiyasi safida jang qilgan 66 nafar O‘zbekiston fuqarosi halok bo‘lganligi haqida BBC va Mediazona nashrlari xabar bermoqda. Bu haqida Zamin.uz xabar berdi.

Ma’lumotlarga ko‘ra, ushbu urush davomida 118 ming 139 nafar rossiyalik harbiy halok bo‘lgan, ulardan 500 dan ortig‘i xorij fuqarolaridir. Rossiya armiyasida xizmat qilgan xorijliklar jami 28 davlatdan bo‘lib, qurbonlar soni bo‘yicha Shimoliy Koreya fuqarolari yuqori o‘rinlardan birini egallaydi.

Janubiy Koreya razvedkasi ma’lumotlariga ko‘ra, halok bo‘lgan shimoliy koreyaliklar soni 600 nafarga yetishi mumkin, ammo bu rasmiy tasdiqlanmagan. Markaziy Osiyo davlatlari orasida Tojikiston 72 nafar qurbon bilan birinchi o‘rinda, O‘zbekiston esa 66 nafar fuqarosi bilan ikkinchi o‘rinda turibdi.

Tojikistondan 43, O‘zbekistondan esa 46 kishi jazoni yengillashtirish va’dasi bilan urushga jalb qilingan. Ularning aksariyati “Vagner” xususiy harbiy kompaniyasi bilan shartnoma tuzgan.

Huquq faollari fikricha, Rossiya urushga migrantlarni jalb etish orqali ularga bosim o‘tkazmoqda. Migrantlarga urushda qatnashish evaziga Rossiyaga kirish taqiqini olib tashlash, fuqarolikni tezlashtirish yoki deportatsiyadan qutulish kabi va’dalar berilgan.

Ba’zi hollarda esa migrantlar Rossiya Mudofaa vazirligi bilan shartnoma imzolashga tahdid ostida majburlangan. MDHdan tashqaridagi yo‘qotishlar orasida eng ko‘p qurbon Nepalga to‘g‘ri keladi — 70 kishi, shuningdek, 50 nafar nepallik bedarak yo‘qolgan.

Nepal hukumati Rossiyaga DNK namunalarini yuborib, o‘z fuqarolarini aniqlashga harakat qilmoqda. Gruziya fuqarolari orasida ham 63 nafar yo‘qotish mavjud.

Ularning aksariyati 1990-yillarda Gruziya nazoratidan chiqqan Janubiy Osetiya va Abxaziya hududlaridan bo‘lib, Kavkazdan jalb etilganlar orasida professional harbiylar va sobiq ofitserlar ham bor. Rossiya armiyasi tarkibida jang qilganlar orasida Afrikaning bir necha mamlakatlaridan, jumladan Efiopiya, Zambiya, Markaziy Afrika Respublikasi, Tanzaniya va Togo fuqarolari ham bor.

Shri Lanka hukumati 288 nafar iste’fodagi harbiy fuqarosining Rossiyaga yollanganini, ulardan 16 nafari halok bo‘lganini ma’lum qildi. BBC xabariga ko‘ra, Rossiya safida bir necha amerikaliklar ham bor.

Ukraina armiyasi tarkibida esa 2-3 ming atrofida amerikalik ko‘ngilli jang qilmoqda. Bundan tashqari, Rossiya qurolli kuchlarida xizmat qilib urushda halok bo‘lgan 54 nafar Ukraina fuqarosi aniqlangan.

Ular urush boshlanishidan oldin Ukraina nazoratidagi hududlarda ro‘yxatda bo‘lgan shaxslardir. Ushbu statistik ma’lumotlar Rossiya- Ukraina urushining global miqyosda ko‘plab insonlarning hayotiga qanday og‘ir ta’sir ko‘rsatayotganini yana bir bor tasdiqlaydi.