Mashhur Wizz Air aviakompaniyasi 2025 yil 1 sentyabrdan boshlab Abu-Dabidagi parvozlarini to‘xtatishini e’lon qildi. Bu haqida Zamin.uz xabar berdi.
Bu qaror Yaqin Sharq mintaqasidagi beqaror geosiyosiy vaziyat, ayrim havo yo‘llarining yopilishi va bozordagi cheklovlar sababli qabul qilindi. Kompaniya vakillarining ta’kidlashicha, ushbu omillar Abu-Dabi bazasida faoliyat yuritishni moliyaviy jihatdan samarasiz holga keltirdi va daromad olish imkoniyatini yo‘qotdi.
Endilikda Wizz Air asosiy diqqat markazini Markaziy va Sharqiy Yevropa bozorlariga qaratadi. Ushbu hududdagi yo‘lovchilar oqimi va bozor imkoniyatlari kompaniya uchun ustuvor hisoblanadi.
Shu bilan birga, ijtimoiy tarmoqlarda tarqalgan ma’lumotlarga ko‘ra, bu qaror O‘zbekiston va BAA o‘rtasidagi ayrim reyslarga ham ta’sir ko‘rsatishi mumkin. Hozircha rasmiy bayonot berilmagan bo‘lsa-da, yurtdoshlarimiz ushbu yo‘nalishdagi parvozlar haqida dolzarb ma’lumotlarni diqqat bilan kuzatib borishlari tavsiya etiladi.
Bu holat yo‘lovchilarning reyslarga tayyorgarlik ko‘rishida ehtiyotkor bo‘lishlarini talab qiladi.
