Kiyevda Voronichni o‘ldirgan FSB agentlari yo‘q qilindi

Ukrainaning poytaxti Kiyev shahrida 10 iyul kuni ertalab otib o‘ldirilgan SBU polkovnigi Ivan Voronichning qotillari yo‘q qilindi. Bu haqida Zamin.uz xabar berdi.

Bu haqda Ukraina xavfsizlik xizmati rahbari Vasiliy Malyuk rasmiy bayonot berdi. Malyukning so‘zlariga ko‘ra, Voronichni nishonga olgan shaxslar Rossiya FSB maxsus tayyorgarlik ko‘rgan agentlari bo‘lgan.

Ularning guruhi ayol va erkakdan iborat bo‘lib, Ukrainaga oldindan yuborilgan hamda Kiyevda bir necha kun davomida polkovnikning kun tartibi va harakat yo‘nalishlarini kuzatgan. Tergov ma’lumotlariga ko‘ra, qotillik arafasida FSB agentlari to‘pponcha yashirilgan joyning koordinatalarini olgan va keyin otishni amalga oshirgan.

Voronich uyidan chiqib ketayotganida unga yaqin kelgan qotil besh marta o‘q uzgan. Jinoyat sodir etilgach, hujumchilar Kiyev viloyatida yashirinishga harakat qilgan.

Qidiruv va kontrrazvedka harakatlari natijasida dushman joylashgan manzil aniqlangan. Ular qo‘lga olinayotganda qarshilik ko‘rsatib, o‘t ochgan.

Natijada hujumchilar yo‘q qilingan. Maxsus operatsiya davomida to‘qnashuv yuz bergan va hodisa joyidan videokadrlarda avtomashinalar hamda yerda yotgan jasadlar ko‘rsatilgan.

Eslatib o‘tamiz, 50 yoshli Ivan Voronich 10 iyul kuni soat 9:00 atrofida uyidan chiqib ketayotganda otib o‘ldirilgan. Otishdan so‘ng qotil voqea joyidan qochib ketgan.

Polkovnik olingan og‘ir jarohatlar sabab voqea joyida vafot etgan. Ushbu voqea Ukrainada xavfsizlik tizimiga qarshi tashqi tahdidlarning kuchayganini yana bir bor tasdiqladi.

Maxsus xizmatlarning tezkor va samarali choralari mamlakat ichidagi xavfsizlikni ta’minlashga jiddiy yondashuv borligini ko‘rsatdi.