Reykjanesda yana vulqon otilishi boshlandi
Islandiyaning janubiy-g‘arbida joylashgan Reykjanes yarim orolida yana bir bor vulqon otilishi qayd etildi. Bu haqida Zamin.uz xabar berdi.
Bu 2023 yil oxiridan beri hududda yuz bergan to‘qqizinchi vulqon faolligi hisoblanadi, deb The Guardian xabar berdi. Islandiya Meteorologiya Instituti ma’lumotlariga ko‘ra, portlash mahalliy vaqt bilan soat 04:00 da boshlandi.
Lavalar yer yuzasidagi yoriqdan otilib chiqqanligi jonli efirda ko‘rsatildi. Keyinchalik asosiy yoriq uzunligi 2,4 kilometrga yetgani, shuningdek, yaqin atrofda 500 metrlik ikkinchi yoriq ham paydo bo‘lgani aniqlangan.
Havoda zaharli gazlar yuqori darajada bo‘lgani sababli, aholi uyda qolishga chaqirildi. Mashhur Blue Lagoon kurorti va unga yaqin joylashgan Grindavik qishlog‘i evakuatsiya qilindi.
Politsiya komissari Margret Kristin Paulsdottirning so‘zlariga ko‘ra, taxminan 100 kishi xavfsiz joyga ko‘chirildi. Ba’zi sayyohlar hududga kirishdan to‘xtatildi.
Islandiya Meteorologiya Instituti geofizigi Benedikt Ofeigssonning ta’kidlashicha, bu portlash avvalgilarga nisbatan kuchsizroq bo‘lib, muhim infratuzilmalarga tahdid solmayapti. So‘nggi portlash aprel oyida ro‘y bergan edi.
Joriy haftada e’lon qilingan xavf bahosida kuzgacha yangi otilish kutilmagani qayd etilgan. Reykjanesdagi vulqonlar 800 yil davomida sukut saqlagan, ammo 2021 yil martidan boshlab hududda faollik kuchaygan.
Mutaxassislar bu hududda “yangi vulqon davri” boshlanganini ta’kidlamoqda. RUV xabariga ko‘ra, bugungi otilish xalqaro aviaparvozlarga ta’sir qilmaydi.
Eslatib o‘tamiz, 2010 yildagi portlash global aviatashuvlarga jiddiy zarar yetkazgan edi. Islandiyada jami 33 ta faol vulqon tizimi mavjud bo‘lib, bu Yevropadagi eng yuqori ko‘rsatkich hisoblanadi.
Mamlakat Yevroosiyo va Shimoliy Amerika tektonik plitalari orasidagi Atlantika o‘rta tog‘ tizmasi ustida joylashgan.
