Andijon kiyim-kechak ishlab chiqarishda yetakchiga aylandi
O‘zbekistonning yirik sanoat tarmoqlaridan biri bo‘lgan kiyim-kechak ishlab chiqarish sohasida Andijon viloyati 2025-yilda yetakchi o‘rinni egalladi. Bu haqda Zamin.uz xabar berdi.
Milliy statistika qo‘mitasi ma’lumotlariga ko‘ra, o‘tgan yili mamlakat bo‘ylab yirik korxonalar tomonidan jami 43,1 trillion so‘mlik kiyim-kechak mahsulotlari ishlab chiqarilgan. Bu ko‘rsatkich 2024-yilga nisbatan 21,7 foizga oshgan.
Mazkur sohada Andijon viloyati eng katta ulushga ega bo‘lib, bu yerda 19,7 trillion so‘mlik mahsulot ishlab chiqarilgan. Viloyatlar kesimida ishlab chiqarish hajmi quyidagicha taqsimlangan: Namangan viloyati — 3,9 trillion so‘m, Toshkent viloyati — 3,6 trillion so‘m, Toshkent shahri — 2,9 trillion so‘m, Farg‘ona viloyati — 2,8 trillion so‘m, Navoiy viloyati — 2,1 trillion so‘m, Qashqadaryo va Buxoro viloyatlari — 1,8 trillion so‘mdan.
Qolgan viloyatlarda esa ishlab chiqarish hajmi 1 trillion so‘mdan kamni tashkil etgan. Andijon viloyatining ushbu sohadagi ulushi respublika bo‘yicha umumiy ko‘rsatkichning qariyb 46 foizini tashkil qilmoqda.
Bu esa viloyatning tikuvchilik va yengil sanoat sohasidagi imkoniyatlari, ishchi kuchi va ishlab chiqarish quvvatlarining yuqori ekanligini yaqqol namoyon etadi.
