O‘zbekiston Rossiyaga uzum eksportida yetakchi bo‘ldi
2025 yilning hisobotiga ko‘ra, O‘zbekiston Rossiya Federatsiyasiga yangi uzum va mayiz yetkazib berishda eng yirik hamkor bo‘ldi. Bu haqda Zamin.uz xabar berdi.
Rosselxoznadzor ma’lumotlariga ko‘ra, O‘zbekistondan Rossiyaga jami 198 ming tonna ushbu mahsulotlar eksport qilingan, bu esa avvalgi yilga nisbatan 11,4 foizga o‘sdi. Uzum bilan bir qatorda, poliz mahsulotlari eksportida ham O‘zbekiston sezilarli yutuqlarga erishdi.
Qovun, tarvuz va papayya kabi mahsulotlarning Rossiyaga eksporti ikki barobarga oshib, 111 ming tonnaga yetdi. Bu borada O‘zbekiston Turkiya va Ozarboyjondan oldinda.
Quritilgan mevalar bozorida ham O‘zbekistonning ulushi katta bo‘lib qolmoqda. O‘tgan yili Rossiya iste’molchilari O‘zbekistondan 10,5 ming tonna sifatli quruq mevalarni sotib olishdi, bu esa eksport hajmi 28 foizga oshganini ko‘rsatadi.
O‘tgan yili Rossiya 6,1 million tonna meva va yong‘oq mahsulotlarini import qildi. Asosiy yo‘nalishlar quyidagicha: sitrus mevalar 1,8 million tonna (asosiy yetkazib beruvchi — Turkiya), banan 1,4 million tonna, rezavor mevalar 528 ming tonnadan ortiq (Ozarboyjon va Xitoy yetakchi), yong‘oqlar 90 ming tonna (Vetnam, Eron va Filippin asosiy hamkorlar).
Xitoydan uzum va mayiz importi uch barobarga oshgan bo‘lsa-da, O‘zbekiston o‘z yetakchiligini saqlab qoldi. Bu esa mahalliy mahsulotlarimizning nafaqat miqdori, balki sifati va ta’mi ham xalqaro bozorda yuqori baholanishini isbotlaydi.
O‘zbek dehqonlari tomonidan yetishtirilgan mahsulotlar bugun millionlab xorijlik xonadonlar dasturxonidan joy olmoqda. Eksport salohiyatining bunday o‘sishi mamlakatimiz iqtisodiyoti uchun yangi imkoniyatlar ochishi shubhasiz.
O‘zbek mevalarining jahon bozoridagi raqobatbardoshligini yanada oshirish uchun sifatni yaxshilash va marketingga e’tibor qaratish lozim.
