Harbiy ziddiyatlar neft narxini keskin oshirdi
O‘tgan hafta jahon bozorida xom neft narxi sezilarli darajada oshdi. Bu haqda Zamin.uz xabar berdi.
Bunga AQSh va Isroilning 28 fevral kuni Eronga qarshi amalga oshirgan harbiy zarbalari sabab bo‘ldi. Ushbu harbiy amaliyotlar natijasida energiya resurslari narxi bir hafta ichida 27 foizdan 36 foizgacha oshdi.
Hafta oxiriga kelib, bir barrel neft narxi 90 dollardan oshdi. Mutaxassislar narxlarning oshishiga Hormuz bo‘g‘ozidagi logistik muammolar sabab bo‘lganini ta’kidlamoqda.
Bu hududdan kuniga 15 million barrel neft tashilishi to‘xtab qolganligi global ta’minot zanjiriga jiddiy zarba berdi. Bu holat jahon iqtisodiyotida energiya xavfsizligi masalasini yana kun tartibiga chiqardi.
Hozirgi vaziyatda bozor ishtirokchilari va tahlilchilar kelgusi kunlarda narxlar qanday o‘zgarishini kuzatmoqda. Agar mintaqadagi harbiy taranglik davom etsa, neft narxlarining yana oshishi ehtimoli bor.
Bu esa transport va ishlab chiqarish xarajatlarining oshishiga olib kelishi mumkin.
