Soliq qo‘mitasi keshbek tizimi to‘xtatilishi haqidagi xabarlarni inkor etdi
Soliq qo‘mitasi ijtimoiy tarmoqlarda keshbek tizimining to‘xtatilishi haqida tarqalgan xabarlarga rasmiy munosabat bildirdi. Bu haqda Zamin.uz xabar berdi.
Idora ma’lumotlariga ko‘ra, davlat tomonidan joriy etilgan ushbu tizimni bekor qilish yoki uning faoliyatini cheklash ko‘zda tutilmagan. Aksincha, tizimning yanada adolatli ishlashini ta’minlash choralari ko‘rilmoqda.
Amaldagi tartibga muvofiq, Ijtimoiy himoya yagona reyestriga kiritilgan fuqarolar uchun alohida imtiyozlar belgilangan. Xususan, mol va qo‘y go‘shti, tuxum, o‘simlik yog‘i, un, shakar hamda dori vositalari xaridi uchun to‘langan qo‘shilgan qiymat solig‘i summasi to‘liq qaytarib beriladi.
Biroq so‘nggi vaqtlarda ayrim shaxslar va tadbirkorlar ushbu imkoniyatdan g‘arazli maqsadlarda foydalanishga urunishgani ma’lum bo‘ldi. Soliq organlari tomonidan o‘tkazilgan o‘rganishlar davomida soxta cheklarni rasmiylashtirish orqali mablag‘larni asossiz o‘zlashtirish holatlari aniqlangan.
Masalan, may oyining o‘zida respublika bo‘yicha yuz minglab shubhali xaridorlar ro‘yxatga olingan va o‘nlab milliard so‘mlik to‘lovlar vaqtincha to‘xtatilgan. Navoiy, Farg‘ona va Andijon viloyatlarida o‘n minglab fuqarolar tomonidan ro‘yxatdan o‘tkazilgan milliardlab so‘mlik keshbeklar shubhali deb topilib, ularning to‘lovi ushlab qolindi.
Qo‘mita ta’kidlashicha, bunday choralar tizimni yopish uchun emas, balki byudjet mablag‘larining talon-toroj qilinishining oldini olish uchun ko‘rilmoqda. Fuqarolardan faqat o‘zlari amalga oshirgan xaridlar cheklarini ro‘yxatdan o‘tkazish so‘raladi.
Boshqa shaxslarga tegishli yoki soxta cheklardan foydalanish qonunchilikka zid ekani va bunday holatlar nazoratga olinishi eslatib o‘tildi. Agar fuqarolar soxta cheklarni sotish yoki boshqa turdagi firibgarlik holatlariga duch kelsa, soliq organlarining maxsus bo‘limlariga murojaat qilishlari tavsiya etiladi.
Davlat soliq xizmati barcha jarayonlar qonun doirasida va shaffof amalga oshirilishini nazorat qilib boradi.
