O‘zbekistonda issiqxona xo‘jaliklari uchun soliq va energiya imtiyozlari berildi
O‘zbekistonda issiqxona xo‘jaliklarini rivojlantirish, sohaga zamonaviy texnologiyalarni jalb etish va aholi daromadlarini oshirish maqsadida Prezident qarori qabul qilindi. Bu haqda One.uz xabar beradi.
Mazkur hujjatga ko‘ra, issiqxona faoliyati bilan shug‘ullanuvchi tadbirkorlar va tomorqa egalari uchun soliq yukini kamaytirish, sarflangan energiya xarajatlarini qoplash hamda imtiyozli moliyaviy ko‘mak berish tizimi joriy etilmoqda. Xususan, yer va mol-mulk soliqlari stavkalari ikki barobarga pasaytirilib, energiya tejamkor texnologiyalardan foydalanuvchi xo‘jaliklarga elektr energiyasi xarajatlarining yarmi subsidiya sifatida qaytarib berilishi belgilandi.
Soliq imtiyozlari va energiya xarajatlarini qoplash Yangi tartibga muvofiq, 2027-yilning boshidan 2030-yilgacha bo‘lgan davrda issiqxona xo‘jaliklaridan olinadigan yuridik shaxslarning yer va mol-mulk soliqlari stavkalari 50 foizga kamaytiriladi. Ushbu imtiyozdan foydalanish uchun tadbirkorlik subyektining umumiy tushumida issiqxona faoliyatidan keladigan daromad ulushi kamida 60 foizni tashkil etishi lozim.
Bu chora tadbirkorlarga o‘z mablag‘larini ishlab chiqarishni kengaytirish va yangi texnologiyalarni joriy etishga yo‘naltirish imkonini beradi. Shuningdek, qishki mavsumda issiqxonalarni isitish bilan bog‘liq xarajatlarni kamaytirish choralari ko‘rilmoqda.
2026-yildan boshlab oktyabr va mart oylari oralig‘ida zamonaviy issiqlik saqlovchi qoplamalar yoki yashil isitish tizimlaridan foydalanadigan xo‘jaliklarga iste’mol qilingan elektr energiyasi qiymatining 50 foizi davlat tomonidan to‘lab beriladi. Bu tizim issiqlik nasoslari, geotermal va quyosh issiqlik qurilmalarini o‘rnatgan tadbirkorlarni qo‘llab-quvvatlashga xizmat qiladi.
Hududiy qo‘llab-quvvatlash va imtiyozli kreditlash Toshkent viloyatining issiqxonachilikka ixtisoslashgan tumanlari uchun alohida moliyaviy ko‘mak choralari belgilangan. Jumladan, Zangiota, Qibray, Yangiyo‘l va Yuqori Chirchiq kabi tumanlarda aholi tomorqalariga energiya tejamkor uskunalar o‘rnatish xarajatlarining 40 foizi, ya’ni 100 million so‘mgacha bo‘lgan qismi subsidiya sifatida qoplanadi.
Kambag‘allikni qisqartirish dasturi doirasida esa tanlab olingan 50 ta mahalladagi oilalarga 200 million so‘mgacha beg‘araz yordam mablag‘lari ajratilishi ko‘zda tutilgan. Shu bilan birga, oilaviy tadbirkorlikni rivojlantirish dasturlari doirasida yashil issiqxonalar barpo etish uchun 300 million so‘mgacha bo‘lgan miqdorda imtiyozli kreditlar taqdim etiladi.
Ushbu moliyaviy vositalar aholining bandligini ta’minlash, bozorlarda oziq-ovqat mahsulotlari narxining barqarorligini saqlash va eksport salohiyatini oshirishda muhim omil bo‘ladi. Mazkur qaror mamlakatimizda qishloq xo‘jaligini modernizatsiya qilish yo‘lidagi navbatdagi qadamdir.
