Navoiy va Chirchiqda fuqaro daromad deklaratsiyasi sinovda boshlandi
O‘zbekistonda fuqarolarning yillik daromadlari va xarajatlarini deklaratsiyalash bo‘yicha yangi tartib belgilandi. Bu haqda One.uz xabar beradi.
2026–2027 yillarda sinov tariqasida amal qiladigan tizim faqat Navoiy va Chirchiq shaharlarida hisobda turgan muayyan toifadagi fuqarolarga taalluqli. Hisobot har yili 1 aprelgacha taqdim etilishi kerak.
Bu hozircha butun mamlakat aholisiga birdek tatbiq etiladigan majburiyat emas. Kimlar deklaratsiya topshiradi Sinov loyihasi 2026 yil 1 martdan boshlab joriy etildi.
U Navoiy va Chirchiq shaharlarida doimiy yashash joyi bo‘yicha ro‘yxatga olingan, 18 yoshga to‘lgan jismoniy shaxslar va soliq organlari xodimlarini qamrab oladi. Belgilangan tartibda ayrim istisnolar ham nazarda tutilgan.
Hisobot yilida soliq organiga ishga qabul qilinganiga va tegishli hisobga qo‘yilganiga olti oy to‘lmagan xodimlar ushbu talab doirasiga kirmaydi. Demak, Toshkent shahri yoki mamlakatning boshqa hududlarida yashovchi barcha fuqarolar yangi sinov tartibi bo‘yicha deklaratsiya topshirishi shart emas.
Deklaratsiya muddatlari Hisobot o‘tgan kalendar yildagi daromadlar va xarajatlar bo‘yicha shakllantiriladi. Uni keyingi yilning 1 aprelidan kechiktirmay yuborish lozim.
Masalan, sinov loyihasi ishtirokchilari 2026 yildagi daromadlari va xarajatlari bo‘yicha deklaratsiyani 2027 yil 1 aprelgacha taqdim etishlari kerak. Deklaratsiyani soliq qo‘mitasining elektron soliq xizmatlari portali my3.soliq.uz va «Soliq» mobil ilovasi orqali yuborish mumkin.
Belgilangan muddat yaqinlashganda soliq organlari ishtirokchilarga deklaratsiya taqdim etish zarurligi haqida xabarnoma yuboradi. Ma’lumotlar qanday yig‘iladi Yangi tizimning muhim jihati shundaki, fuqarolarning moliyaviy ma’lumotlari faqat ularning o‘zi taqdim etgan axborot asosida emas, balki davlat idoralari va elektron tizimlarda mavjud ma’lumotlar orqali ham shakllantiriladi.
Xarajatlarni hisoblashda ko‘chmas mulk va transport vositalarini sotib olish bilan bog‘liq ma’lumotlar, «Soliq» mobil ilovasida ro‘yxatdan o‘tkazilgan tovarlar va xizmatlar cheklari, savdo va xizmat ko‘rsatish korxonalari tomonidan rasmiylashtirilgan elektron hisobvaraq-fakturalar, shuningdek davlat idoralari ma’lumotlaridan foydalaniladi. Shuningdek, deklaratsiyada mehnatga haq to‘lash tarzidagi daromadlar, mulkiy daromadlar, moddiy naf va boshqa tegishli tushumlar aks ettiriladi.
Agar mavjud ma’lumotlar yetarli bo‘lmasa, fuqaroga qo‘shimcha axborot so‘ralishi mumkin.
