O‘zbekiston fuqarolari O‘rta yer dengizi, Skandinaviya va Karib havzasidagi kruiz kemalarida ishlash imkoniyatiga ega bo‘ladi. Bu haqida Upl.uz xabar berdi.
Ingliz tilini biladigan fuqarolar xalqaro kruiz kemalarida rasmiy tarzda ishga joylashishlari mumkin. Yangi hamkorlikning asosiy afzalliklaridan biri vizalar bilan bog‘liq jarayonlarning soddalashtirilishidir.
C1/D turistik tranzit vizasi ish beruvchi tomonidan 45 dan 90 kungacha bo‘lgan muddatga rasmiylashtiriladi, bu esa chet elga chiqish jarayonini ancha yengillashtiradi. O‘zbekiston Migratsiya agentligi va Makedoniyaning Kouzon Corporation kompaniyasi o‘rtasida mehnat faoliyatini tashkil etish bo‘yicha anglashuv memorandumi imzolandi.
Bu hamkorlik orqali fuqarolarimiz uchun chet elda ishlash imkoniyatlari kengayadi. Yaqin kelajakda loyiha ijrosini batafsil ko‘rsatadigan yo‘l xaritasi ishlab chiqiladi.
Kruiz kemalaridagi ish sharoitlari quyidagicha: - boshlang‘ich oylik maosh 1200 dollardan boshlanadi va 6 oylik shartnoma asosida belgilanadi; - shartnoma tugagach, ikki oylik ta’til beriladi, undan so‘ng yangi 6 oylik shartnoma tuzilishi mumkin; - ish tajribasi oshgani sayin maosh 4000 dollargacha yetishi mumkin; - barcha yashash xarajatlari ish beruvchi kompaniya tomonidan qoplanadi. Kouzon Corporation 28 yillik tajribaga ega bo‘lib, 18 mamlakatda faoliyat yuritadi va malakali mutaxassislarni kruiz sanoatiga tayyorlash hamda ishga joylashtirish bo‘yicha ishonchli hamkor hisoblanadi.
Kompaniya har yili dunyo bo‘ylab 20 mingdan 25 minggacha odamga ish bilan ta’minlaydi, bu uning yuqori professional darajasini va keng ko‘lamli faoliyatini ko‘rsatadi. Kouzon Corporation hamkorlik qilayotgan kruiz kemalari O‘rta yer dengizi, Tinch okeani, Skandinaviya, Baltika va Karib havzasidagi mashhur sayyohlik yo‘nalishlarini xizmat qiladi.
