Buxoro viloyati IIB Yo‘l harakati xavfsizligi boshqarmasi matbuot xizmati tomonidan yo‘l harakati qoidalarini buzgan shaxsga nisbatan tegishli choralar ko‘rilgani ma’lum qilindi. Bu haqida Upl.uz xabar berdi.
Ijtimoiy tarmoqlarda "Spark" avtomobilining haydovchisi M-37 avtomobil yo‘lida xavfli va takroriy harakatlarni amalga oshirayotgani aks etgan video tarqaldi. Ushbu harakatlar natijasida haydovchi bir necha marotaba avariyaviy vaziyatlar yuzaga keltirgan va boshqa yo‘l harakati ishtirokchilari hayotiga xavf solgan.
Hodisa Buxoro viloyatida sodir bo‘lgan. Mazkur holat bo‘yicha fuqaroga O‘zbekiston Respublikasi Ma’muriy javobgarlik kodeksining "Yo‘l harakati xuliganligi" moddasiga muvofiq ma’muriy bayonnoma rasmiylashtirildi.
Shuningdek, uning avtomobili jarima maydonchasiga joylashtirildi. Ushbu modda bo‘yicha jarima miqdori 25 bazaviy hisoblash miqdorini, ya’ni 9 375 000 so‘mni tashkil etadi va haydovchilik guvohnomasidan 1 yildan 2 yilgacha mahrum qilish jazosi qo‘llaniladi.
Boshqarma tomonidan aytib o‘tilishicha, ushbu haydovchi haydovchilik guvohnomasidan mahrum etilgan.
