Ozarbayjon hukumati 43 yoshli O‘zbekiston fuqarosi Amonbek Yusupovni davlatlararo qidiruv asosida O‘zbekiston Prezidenti sha’ni va qadr-qimmatiga tajovuz qilish aybi bilan Ozarbayjondan O‘zbekistonga topshirdi. Bu haqida Upl.uz xabar berdi.
Bu haqda Ozarbayjon Bosh prokuraturasi matbuot xizmati ma’lumot berdi. Mazkur shaxs aprelda Ozarbayjon hududida qo‘lga olingan.
Ekstraditsiya O‘zbekiston Bosh prokuraturasi tomonidan amaldagi xalqaro kelishuvlar doirasida yuborilgan so‘rovnoma asosida amalga oshirildi. Ushbu topshirish jarayoni 2002 yil 7 oktabrda Kishinyovda imzolangan “Fuqarolik, oila va jinoyat ishlari bo‘yicha huquqiy yordam va huquqiy munosabatlar to‘g‘risida”gi konvensiya qoidalariga muvofiq bajarildi.
Mazkur hujjat ishtirokchi davlatlar vakolatli organlari o‘rtasidagi jinoyat ishlari bo‘yicha hamkorlikni tartibga soladi. Amonbek Yusupov O‘zbekiston vakillariga Ozarbayjon Adliya vazirligining Jazoni ijro etish xizmati tomonidan tashkil etilgan maxsus konvoyda topshirildi.
Hozirda u O‘zbekistonga olib kelinib, milliy qonunchilikka muvofiq tergov harakatlari olib borilmoqda. Shuni ta’kidlash lozimki, 2021 yil mart oyida O‘zbekiston Jinoyat kodeksiga Prezident sha’ni va qadr-qimmatini jamoat oldida, shu jumladan telekommunikatsiya tarmoqlari va internet orqali kamsitish yoki tuhmat qilish uchun javobgarlik belgilovchi o‘zgartirishlar kiritilgan.
Ushbu jinoyat uchun besh yilgacha ozodlikdan mahrum qilish jazosi qo‘llanilishi mumkin. 2002 yildagi Kishinyov konvensiyasi MDH mamlakatlari hududida huquqiy yordam ko‘rsatishni soddalashtiruvchi va yagona tartibga soluvchi muhim xalqaro hujjat hisoblanadi.
U ayniqsa jinoyat sodir etgan shaxslarni ekstraditsiya qilish jarayonini osonlashtiradi.
