Toshkent shahrining suv ta’minoti va kanalizatsiya tizimini modernizatsiya qilish loyihasi doirasida yashash uylarida zamonaviy aqlli suv hisoblagichlari o‘rnatiladi. Bu haqida Upl.uz xabar berdi.
Bu haqda “Uzsuvta’minot” aksiyadorlik jamiyati matbuot xizmati ma’lum qildi. Loyiha asosiy maqsadi ichimlik suvi iste’molini samarali nazorat qilish uchun ilg‘or raqamli texnologiyalarni joriy etishdir.
Mavjud hisoblagichlar iste’molchilar va xizmat ko‘rsatuvchilar uchun noqulayliklar tug‘dirgan, ma’lumotlarni o‘z vaqtida uzatmaslik hisob-kitoblarda chalkashliklarga olib kelgan. Yangi aqlli hisoblagichlar ushbu muammolarni bartaraf etishga qaratilgan bo‘lib, ikki tomonlama foyda beradi.
Ular avtomatik ma’lumot uzatish imkoniyatiga ega bo‘lgan radio modul bilan jihozlangan bo‘lib, suv iste’molini aniq hisoblashni ta’minlaydi. Shuningdek, yangi qurilmalar quvurlar va uskunalardagi nosozliklarni aniqlay oladi hamda noqonuniy aralashuvlarni qayd etadi.
Hisoblagich egalari endi ko‘rsatkichlarni qo‘lda kiritish bilan shug‘ullanishlari shart emas. Barcha ma’lumotlar shaxsiy kabinet orqali onlayn tarzda mavjud bo‘ladi va to‘lovlarni mobil ilovalar orqali qulay amalga oshirish mumkin bo‘ladi.
Xizmat ko‘rsatuvchi tashkilot esa ma’lumotlarni masofadan yig‘ib, suv yo‘qotilishining oldini tezda olishi mumkin bo‘ladi. Ishlab chiqaruvchi yangi hisoblagichlarga besh yillik kafolat beradi.
Ularning ommaviy o‘rnatilishi joriy yilning uchinchi choragida Yangihayot tumanidan boshlanadi. Keyingi besh yil davomida 670 mingta uyda bular bepul o‘rnatiladi, bu xarajatlarni “Toshkent shahar suv ta’minoti” aksiyadorlik jamiyati qoplaydi.
“Uzsuvta’minot” vakillari o‘rnatish jarayoni fuqarolarga hech qanday noqulaylik tug‘dirmasligini ta’kidladilar. Quvurlarda payvandlash yoki ta’mirlash ishlari talab etilmaydi.
